MATEU 16

₁Bafarisei ba bangwe le Basadusei ba kile ba tla go Jesu gore ba mo leke, mme ba mo kgopela gore a ba bontšhe mohlolo go laetša gore o romilwe ke Modimo. ₂Eupša Jesu a ba fetola a re: “Mantšiboa le re: ‘Ka moswane le tla hlaba gabotse, ka gobane leratadima le hwibitše.’ ₃Gomme ge go esa le re: ‘Lehono go tla na pula ya ledimo, ka gobane leratadima le hwibitše ebile le na le maru.’ Le kgona go tseba seemo sa moso ka go lebelela leratadima, fela ga le kgone go kwešiša gore ditiragalo tša mehla yeno di šupa eng. ₄Ke moloko wo mobe wa bakgelogi wo o nyakago mohlolo, eupša o ka se bontšhwe mohlolo wo mongwe ge e se mohlolo wa moprofeta Jona.”

Ke moka a ba tlogela a sepela.

₅Ge barutiwa ba tshelela ka mošola wa letsha ba ile ba lebala go tšea mphago wa dinkgwa. ₆Jesu a re go bona: “Le itoteng, le tšhabe komelo ya Bafarisei le ya Basadusei.”

₇Ba thoma go boledišana ba re: “O bolela ka tsela ye ka gobane ga se ra tla le dinkgwa.”

₈Jesu a tseba se ba se bolelago, ka gona a ba botšiša a re: “Ke ka lebaka lang le boledišana ka go hloka dinkgwa, lena ba tumelo ye nnyane? ₉Na ga sešo la kwešiša? Kgane ga le sa gopola mola ke ngwathaganya dinkgwa tše tlhano ke di fa banna ba dikete tše tlhano? Le ile la tlatša diroto tše kae ka marathana a go šala? ₁₀Ka dinkgwa tše di šupago tšela ke ilego ka di fa banna ba dikete tše nne gona le gopolang? Le ile la tlatša diroto tše kae ka marathana a go šala? ₁₁Bjale le reng le sa kwešiše gore ke be ke sa bolele ka dinkgwa? Le tšhabe komelo ya Bafarisei le ya Basadusei!”

₁₂Ke moka barutiwa ba lemoga gore o be a sa ba botše gore ba tšhabe komelo ya dinkgwa, eupša o be a era gore ba itlhokomele dithutong tša Bafarisei le tša Basadusei.

₁₃E rile ge Jesu a fihla tikologong ya motse wa Kesarea-Filipi a botšiša barutiwa ba gagwe a re: “Na batho ba re Morwamotho ke mang?”

₁₄Bona ba mo fetola ba re: “Ba bangwe ba re ke wena Johanese Mokolobetši, bangwe ba re o Eliya, mola bangwe ba re o Jeremia goba yo mongwe wa baprofeta.”

₁₅Jesu a ba botšiša a re: “Lena le re ke nna mang?”

₁₆Gwa fetola Simone Petrose a re: “Ke wena Mesia, Morwa wa Modimo yo a phelago.”

₁₇Jesu a re go yena: “O lehlogonolo, wena Simone, morwa wa Johanese, ka gobane se ga se wa se utollelwa ke motho, eupša o se utolletšwe ke Tate wa legodimong. ₁₈Etse ke wena Petrose. Bjale godimo ga lona leswika le ke tla aga kereke ya ka, gomme le ona maatla a lehu a ka se e fenye. ₁₉Ke tla go fa dikgonyo tša legodimo; se o se iletšago lefaseng, le legodimong se tla iletšwa; le se o se dumelelago lefaseng, le legodimong se tla dumelelwa.”

₂₀Ke moka Jesu a laya barutiwa ba gagwe gore ba se ke ba botša motho gore ke yena Mesia.

₂₁Go tloga ka nako yeo Jesu a thoma go botša barutiwa ba gagwe phatlalatša gore o swanetše go ya Jerusalema, a yo tlaišwa kudu ke bagolo ba setšhaba, le baprista ba bagolo, le boramangwalo, a be a bolawe, eupša ka letšatši la boraro a tsošwe ke Modimo bahung.

₂₂Petrose a mmiletša thoko gomme a mo kgala a re: “Modimo a go lote, Morena! Taba yeo e se ke ya go hlagela.”

₂₃Jesu a furalela Petrose a re: “Sathane, tloga ka morago ga ka! O a nkgopiša, ka gobane ga o nagane tša Modimo, o nagana tša batho.”

₂₄Ke moka Jesu a re go barutiwa ba gagwe: “Ge motho a nyaka go ba molatedi wa ka, a ikone, a ikemišetše go tlaišwa bjalo ka nna, gomme a ntatele. ₂₅Gobane yo a ipabalelago o tla lahlega, eupša yo a itatolago ka lebaka la ka o tla phelela sa ruri. ₂₆Etse motho go tla mo holang go rua lefase lohle, eupša a loba sebaka sa go hwetša bophelo bjo bo sa felego? Goba ke eng se motho a ka rekago bophelo bjo bo sa felego ka sona? ₂₇Gobane Morwamotho o tlilo tla ka letago la Tatagwe le barongwa ba gagwe, a putsa yo mongwe le yo mongwe go ya ka mediro ya gagwe. ₂₈Ruri, ke a le botša, go na le ba bangwe mo ba ba ka se kego ba hwa ba sešo ba bona Morwamotho a etla e le Kgoši.”