Gopola maatla a gagwe – Letšatši la 12

A ke mantšu a bohlokwa kudu gomme a swanetšwe go tšeelwa godimo. Le ge go le bjalo, ke nnete gape gore mantšu a a bakile tlhakatlhakano e kgolo le tshwenyego dipelong tša batho ba ba ka se dirego sebe.

Morena wa rena o be a bolela le batho ba ba hlatseditšego mehlolo e megolo le go bona dipontšho tše ntši tša maatla a gagwe le boipolelo bja ga gagwe bja go ba Morwa wa Modimo. Le ge go le bjalo, ba thatafaditše dipelo tša bona le go gana go mo amogela. Go e na le moo, ba mo latofaditše ka go šomišana le diabolose.

Moya wo Mokgethwa ke wona wo o beago Jesu pele ga rena, le go bolela le dipelo le matswalo a rena. Go gana ditutuetšo tše, ke gore go Jesu, “Ga ke go nyake bophelong bja ka.” Seo ke se “boramangwalo” (Markose 3:22) ba bego ba se dira. Ka gona, thokgako, go ema kgahlanong goba go gana Moya wo Mokgethwa ga go mabapi le mantšu feela – ka gobane ke mang mo go rena yo a sa kago a gana Mophološi lebakeng le lengwe? Aowa! Go roga Moya wo Mokgethwa ke go tšwela pele le go thatafatša dipelo tša rena gomme se se baka tahlo ya bophelo ka moka ya Kriste le phološo ya gagwe e kgolo. Go hlokafala o sa phološwa go hlaloša gore ga go na phološo, ga gona kgetho yengwe ye e lego gona. Go hlaloša “go hwa o timetše”.

Le ge go le bjalo, yeo ga se wena. O bala se ka gobane o nyaka go kwa go tšwa go yena. O nyaka ditaba tše mabapi le yena. O hlologela maatla a mantši go mo latela.

Go be go na le bosesi ba babedi ba ba tšofetšego bao ke bego ke ba tseba bao ba bego ba tshwenyegile gore ba ahloletšwe, ka gobane nako le nako ge ba kgothama ba rapela, menagano ya bona e be e tletše ka dikgopolo tša thokgako. Eupša aowa, e be e se thogako kgahlanong le Moya wo Mokgethwa! Seo ke feela tlhaselo ya diabolose kgahlanong le matswalo a a kgomegago gabonolo. Ka dinako tše dingwe, batho ba ba nago le mathata a ba tshwenyegago ka wona kudu monaganong, maemo a poifo goba dinyakwa tša monagano ba ka huetšwa gabonolo gore ba dirile sebe se segolo kudu.

Hle kgothatšega – Jesu ga a tla go ahlolelwa eupša go phediša.

Ka moka bao ba hlologelago go mo latela gomme ba dumela ka nnete go mošomo wa gagwe wa go phološa sefapanong, go sa šetšwe gore ba fokola goba ba tshwenyegile bjang, ba tla akaretšwa lefaseng le legolo le leswa. Ke bao fela ba tšwelago pele go mo latola le tsela ya gagwe ya phološo, bao ba tlago timela. Bao ba phegelelago go iphološa goba ba naganago gore ba lokile kudu gomme, ka gona, ga ba nyake Mophološi – bao ke bona ba lego kotsing ya go ya go ile.