Gopola maatla a gagwe – Letšatši la 11

Kanegelo go Markose 5:22-43 e tletše ka dilo tše di kgahlišago le tše di makatšago. Jesu o kgopelwa ke monna yo a lego mathateng le tlalelong go fodiša morwedi wa gagwe wa mengwaga ye lesometee. Monna yo, Jairose, e be e se lenaba goba moswaya-diphošo tša Morena wa rena. E be e le tate, le ge go le bjalo, o be a na le maemo a godimo setšhabeng ka gobane e be e le yo mongwe wa baetapele ba sinagoge.

Re bala gore Jesu o sepetše le yena eupša tseleng, o diegišitše ke motho yo mongwe yo a bego a na le tlhoko e kgolo. Mosadi yo a mo emišitšego tseleng ya go yo fodiša ngwanenyana, o tlaišegile mengwagangwaga ka bolwetši bja ngope. Re ka nagana feela gore seo se be se hlaloša eng go yena mmeleng, monaganong le go pheleng le batho ka gobane o be a tla be a tšhilafetše, gomme ge e ba o be a nyetše, monna wa gagwe a ka be a be a mo hlapile diatla. Ka gona, Jesu o a ema go mo thuša.

Le ge go le bjalo, nagana lapa le emetše Jesu ka pelaelo e kgolo. Naa ga a tsebe gore boemo bja ngwanenyana bo a hlobaetša? Ke ka lebaka la eng a sa fihle ka bjako? Ke ka lebaka la eng a dumela gore a diegišwe?

Ke ga kae moo o ikwelego bjalo? Maemo a rena a mpefetše gomme ka tlalelo, re biditše Morena. Le ge go le bjalo, go bonala eka ga go direge selo. Gomme, ditaba di a fihla tša gore ngwanenyana o hlokafetše. Jesu o hlokomologa motseta gomme a kgothaletša lapa gore le be le tumelo. Tumelo go eng? Tumelo go tlholelo goba go sehlare goba go se se sa tsebjego? Aowa, tumelo go YENA. Ka go tshepha yena, ba re, “Re a dumela gore o tšwa go Modimo. Re a dumela gore o na le maatla ka moka legodimong le lefaseng. Le ge re sa kwešiše ditsela tša gago ka moka, re a tseba gore ga o tsebe feela bokaone, eupša o tla dira se se nepagetšego, go dumelelana le merero ya gago.”

Ka ge o tseba, kanegelo e fela gabotse. Ngwaneyana o tsošwa bahung gomme lapa le a kgothatšwa.

Naa se se hlaloša gore ka mehla re tla fodišwa goba bothata bjo bongwe le bjo bongwe bo tla rarollwa ka mo go kgotsofatšago? Aowa! Se kanegelo ya go kgahliša e re botšago sona, ke gore go tlo tla letšatši ge Jesu a tlago re “tsoša” mabitleng gomme lefaseng leo le leswa, leo a tlago tla le lona, go ka se sa ba le lehu, bolwetši goba manyami.

Ge e le gabotse, kanegelo ye e re botša ka fao Morena wa rena a re kwelago bohloko ka gona, gonabjale re sa phela! Ka nnete re ka tliša manyami a rena le dipelaelo go yena. Le ge go le bjalo, gopola gore ngwanenyane o hlokafetše pele pele a tsošwa bahung gape le rena. Maemo a rena a ka bonagala a sa fetoge kudu ka ntle, ge e le gabotse, a ka bonagala a mpefetše kudu. Ka mantšu a mangwe, ka tsela ye nngwe go rena go bonala eke se sebe se se kago direga se direga pele, ka ntle ga thušo go tšwa go Morena.

Le ga go le bjalo, yo a nago le taolo le maatla go dilo ka moka tše di bonwago le go se bonwe, o sa laola maemo a gago ge o le wa gagwe.

Lentšu la gagwe go wena ke, “Se tšhoge, sa gago a e be go dumela.” Se dumele go maatla ao a se nago motheo wa tumelo, bjalo ka ge batho ba bantši ba dira, eupša dumela go yena, go lerato la gagwe go wena, leo le hlatseditšwego ke lehu la gagwe sefapanong, gomme o dumele gore o laola bophelo bja gago le go dira gore dilo ka moka di šomele go hola wena, le go letago la gagwe mafelelong. Go sa šetšwe pheletšo go bothata bja gago, ya manyami goba ya lethabo; o ka se tšwe ka diatleng tša gagwe, goba go tlhokomelo ya gagwe gomme o tla dula o le ka gare ga merero ya gagwe.