Go Thoma ka Leswa – Letšatši la 5

E sa le wa katana le setulo lebatong le le thelelago? Go dula hlenkge go ka ba bothata. Tsela e tee ya go rarolla bothata bjo ke go gomaretša diripa tša raba ka tlase ga maotwana a setulo. Ka tsela ye, setulo se tla ba gabotse gomme sa se sepele bjalo ka pele.

Ge re na le mathata bophelong, re ikwa bjalo ka setulo se se thelelago lebatong le le thelelago. Re swanetše go tsepelela gomme re se lahlegelwe ke taolo ya maphelo a rena. Ka Bibeleng ka moka, banna le basadi ba bantši ba ikhweditše ba le ka gare ga maemo a tlalelo a swanago. Go fa mohlala, nagana ka Josefa, a le tee ka gare ga sele ya kgolego kua Egepeta, Jona a sesa ka sekepe go ya Tarshishe go e na le Ninibe, Gideone a tsena ntweng ka banna ba 300 fela kgahlanong le madira a diketekete goba Estere, a bea bophelo bja gagwe kotsing a ya go kgoši go yo phophothela gore Bajuda ba se bolawe.

Naa ga bjale o na le mathata moo go lego boima kudu go ka tshepha Modimo ka katlego bophelong bja gago? Ekaba o ikwa o ka re ga o na taolo go bophelo bja gago? Ekaba ke nako ya gore o gomaretše diripa tša raba ka tlase ga maoto a setulo sa gago? O se dira bjang seo? Ka go ikgopotša ka se Modimo e lego yena le se a ka go direlago sona. Boela morago lentšung la gagwe go hwetša dikholofetšo tša gagwe. Mo ke dikholofetšo tše nne – e tee ya leoto le lengwe le le lengwe la setulo sa gago:

1. 1.Jesaya 26:4: “Botang Morena go ya go ile, ka mehla ke yena Mošireletši wa lena.”
2. 2.Pesalome 34:5,19: “Mo lebeleleng mme le tla ela difahlego, la se lewe ke dihlong. Morena o kgauswi le bao ba nolegilego moko; o phološa bao ba feletšwego ke tshepo.”
3. 3.Pesalome 31:22-24: “Eupša o kwele sello sa ka mola ke go llela ke nyaka thušo… Tiang maatla, betang dipelo, lena bohle ba le botilego Morena.”
4. 4.Jeremia 17:7-8: “Go lehlogonolo yo a botilego nna, Morena, yo a ithekgilego ka nna. O bjalo ka mohlare wo o bjetšwego kgauswi le moela, wo medu ya wona e nabelago meetseng. Ga o tšhoge phišo, gomme matlakala a wona a dula e le a matala; le ka ngwaga wa komelelo ga o tshwenyege, ga o lese go enywa.”

Modimo o fediša poifo le go tliša go tsepama go maemo ao a sa tsepamago. Se re hlokago go se dira ke go mo laletša maphelong a rena. Gopola, ka dinako tše dingwe ke dinakong tše thata tša maphelo a rena, mo re itemogelago bogona bja gagwe le maatla ka mo go bonagalago kudu. Laola bophelo bja gago, gomaretša diripa tša raba maotong a setulo sa gago gomme o tshephe Modimo go tliša khutšo bophelong bja gago! Modimo a go šegofatše.