Go Thoma ka Leswa – Letšatši la 4
Go Thoma ka Leswa… ka pelo e hlwekilego
(Di)temana ya Bibele
Pesalome 24
MATEU 5
BAEFESO 4
Dinalete, dikonopi, tšhelete ya tshipi, diremoutu tša TV, sebjana sa go tšhela letswai le marapo a diphoofolo. Tše ke tše dingwe tša dilo tša go makatša tše dingaka di di ntšhitšego go balwetši, sepetleleng kua Croatia, mengwaga e fitilego. Mathomong, bašomedi ba sepetlele ba kgobokeditše dilo tše go bontšha baithuti ba bannyane bao ba ithutelago bongaka gore ba swanetše go letela eng ge ba dira balwetši diopareišene. Morago ga moo, sepetlele se kgethile tše dingwe tša dilo tše tša go makatša gomme sa di bea godimo gore baeti ba di bone.
Lebaka le legolo leo le dirilego gore dingaka di tloše dilo tša go makatša ka pelapela ke go thibela bolwetši, bjo bo bakago ke selo, gore bo se phatlalale mmeleng ka moka.
Ka dinako tše dingwe re dumelela “dilo tše makatšago” ka sebopego sa go ikhola, lehufa, boikgogomošo, pefelo le pelo ya go se lebalele go ka mela medu maphelong a rena. Ge re ka se di tsebe gomme ra dumelela Modimo go di tloša, di tla ama maphelo a rena bjalo ka ge bolwetši bo dira.
Modimo ke yo mokgethwa gomme o nyaka gore re phele maphelo a makgethwa. Theeletša mantšu go Pesalome 24:3-4: “Ke mang yo a ka namelago thaba ya Morena? Ke mang a ka tsenago ka Tempeleng ya gagwe ye kgethwa? Ke yo a dirago tše di lokilego, a nago le pelo ye botse.” Theeletša mantšu a Jesu go Mateu 5:8: “Ba lehlogonolo ke ba dipelo tše di hlwekilego, gobane ba tla bona Modimo.”
Go Baefeso 4:23-32, re hwetša ditlhahlo tše bohlokwa go thibela maitshwaro a a kotsi go ka tsena maphelong a rena: “Mokgwa wa lena wa go nagana o swanetše go mpshafatšwa, gomme le tšee tlhago ye mpsha ye e hlodilwego ka go swantšhwa le Modimo, le phele le le baloki ba nnete le bakgethwa ba nnete. Ka gona le lahle maaka … Ge le ka tšhoga le galefile le se ke la lesa kgalefo ya lena e le diriša sebe … Yo a lemetšego go utswa a se sa utswa … Melomong ya lena go se tšwe mahlapa; ge go nyakega gore le bolele, le bolele fela tše di lokilego le tše di holago batho … Le tlogeleng metsoto, le kgalefo, le swele, le mašata, le lesebo, le lehloyo ka moka. Sa lena e be go swarana ka botho le ka kwelobohloko, le swarelaneng diphošo go etša Modimo ge a le swaretše ka Kriste.”
Modimo ke Ngaka ya rena ya go bua. Go feta moo, ka gobane o a re rata, a ka kgona go tloša maitshwaro a a kotsi le go a fediša pele a eba bolwetši maphelong a rena. Ka gona, a re kgopeleng yena go re hlahla ka Moya wa gagwe wo Mokgethwa, go ka tseba maitshwaro a a swanetšego go tlošwa. Se lete pele selemo e eba ngwagola! Modimo a go šegofatše.
