Go Thoma ka Leswa – Letšatši la 6

[Bokamorago: Gantši ke amogela diemeile go tšwa go babadi ba mpotšiša ge eba Modimo a ka ba nea monyetla wa bobedi go lerato. Kanegelo ye e ka go thuša gore o se lahlegelwe ke menyetla ye e šetšego e le gona bophelong bja gago.]

Kgauswi le lebitla le bulegilego la Mary, mogwera wa gagwe Sam o be a kgitla sello. Lehu la gagwe le mo kwešitše bohloko kudu. Baagišani ba bantši go dikologa lebitla ba be ba lebeletšane ba makatše. Ga go yo a lemogilego gore Sam, “senatla se boleta” bjalo ka ge a be a bitšwa, ge e le gabotse o be a rata kudu moagišani wa gagwe legaeng la bao ba rotšego mošomo.

Morago ga ge bahlobogi ba bantši ba tlogile lebitleng, moruti a ya go Sam yo a bego a sa kgitla sello kgauswi le lebitla. “Sam,” moruti a thoma ka lentšu le boleta. “Ke na le nnete ya gore Mary o lefelong le lekaone gomme o thabetše lerato la gago kudukudu ge a be a sa phela”. Morago ga tshwayotshwayo ye, Sam a thoma go kgitla sello a hlabošitše lentšu.

Ge mafelelong a išitše matswalo fase, Sam a retologela go moruti a re, “Moruti, ke ratile mosadi yo mengwagangwaga. Ka letšatši le lengwe … letšatši le lengwe ke nyakile ke mmotša! Eupša, ga ke a mmotša gomme ga bjale selemo ke ngwagola.”

Morago ga tlhalo ya Sam mengwaga pejana, Sam o ile a thoma go ipeela thoko ka poifo ya gore o tla kwešwa bohloko gape. Kgauswi le lebitla la Mary, gateetee a lemoga gore poifo ya gagwe e mo amogile go itemogela monyetla wa bobedi go lerato.

Naa ga bjale o ikhwetša ka gare ga boemo bjo bo swanago? Naa o dumeletše tswalano ye e thubegilego ya nako e fetilego go go amoga monyetla o mongwe go lerato? Ekaba mogwera goba leloko la lapa, yo a go nyamišitšego goba a go kwešitšego bohloko nako e fetilego, o dirile gore o se be le ditswalano tše botse lehono goba o se be le tswalano le lapa la gago?

Theeletša gape mantšu a Paulose go 1 Johanese 4:18: “Lerato ga le na poifo; lerato le le feletšego le raka poifo. Ka gona, yo a boifago ga a na lerato le le feletšego, ka gore o tseba ge a tlilo otlwa.” Go Markose 11:25 re bala gore:“Ge le ema le rapela, le lebalele ba le ba tsotago, gore le lena Tatagolena wa legodimong a le lebalele dibe tša lena.”

Modimo o kgona go fodiša bohloko bofe goba bofe ge fela o mo dumelela go dira seo. A ka go fa monyetla wa bobedi go lerato le lethabo. Se ipeele thoko ka go kgoromeletša batho kgole bophelong bja gago. Ga go selo sa go šiiša go e na le go ema kgauswi le lebitla le bulegilego, o lemoga gore o ka se tsoge o bile le monyetla gape go botša motho wa go ikgetha bophelong bja gago gore o a mo rata! Dira seo lehono. Modimo a go šegofatše.