Go Thoma ka Leswa – Letšatši la 3

[BOKAMORAGO: Ke rata go abelana ka bopaki go tšwa go babadi ba rena ba bararo mabapi le tšhireletšo ya Modimo.]

Mmadi wa 1, Elize go tšwa Australia: “Ke hweditšwe ke na le kankere ya kgato ya 4 ka Dibatsela ngwagola. Ngaka ya ka ya go alafa kankere o rile o tla leka go laola kankere, eupša a palela ke go e alafa. Ka thoma khemotherapi gomme batho lefaseng ka moka ba nthapelela nakong ya dihlopha tša bona tša go rapela.
Morago ga kalafo ye nngwe le ye nngwe, ke be ka babja kudu gomme ke be ke gateletšegile kudu, ka ge balapa la ka ba be ba le ka Afrika Borwa. Le ge go le bjalo, Modimo o rometše batho ba go loka tseleng ya ka torotswaneng ya ka mo Australia.
Morago ga matšatši a mmalwa, ke ile go ngaka go yo dira diteko. Dipoelo? Kankere e nyametše ka mo go feletšego! Ngaka ya makala kudu ya re ke mohlolo ka nnete. Ditheto ka moka di ye go Modimo.”

Mmadi wa 2, Gert: “Bjalo ka mošemane, ke tsene sekolong seo se nago le bodula-barutwana kua Namibia. Mathapama a mangwe, ke be ke le tee ka phapošing mola bana ba bangwe ba raloka ka ntle. Gateetee ka kwa bohloko kudu ka mpeng. Ke be ke le fao, ke le tee, ke pelelwa ke go bolela ke patlame ke kudutane. Bohloko bo be bo le šoro, ke palela ke go sepela.
Ka go tlalela ga ka, ke kwele lentšu la tlasana la Moya wo Mokgethwa le ntlhahla go bitša Modimo. Ka ge ke be ke felela ke maatla, ke kgonne fela go sebaseba: ‘Morena, nthuše …’ ka realo makga a mane. Gateetee, ka kwa boikwelo bjo borutho bo elela mmeleng wa ka, pele ke lemoga gore bohloko bo be bo nyametše ka mo go feletšego! Ka taboga gomme ka tšwa ka phapošing. Ke yo mogolo lehono, eupša nka se tsoge ke lebetše mathapama ao bogoneng bja Modimo. Letago ka moka ke la gagwe!”

Mmadi wa 3, Petro: “Nna le batswadi ba ka re dula mmogo kua Mossel Bay. Mesong ye mengwe le ye mengwe pele ke ya mošomong, nna le mma wa ka re rapela mmogo. Mesong ya maabane, o rapetše gore Modimo a boloke batho ka moka bao ba yago mošong le ge ba boela gae mathapama.
Ge ke le tseleng ya go boela gae maabane, ke be ke eme dirobotong, magahlanong a ditsela, go ka tsena tseleng ya lephefo. Ka yona nako yeo, mmala wa roboto ya ba o motala, ke kwele letsogo khurung ya ka le nthibela go ka gata lekhura. Ka gadima godimo gomme ka bona koloi e etla magahlanong a ditsela. Le ge mmala wa roboto e be e šetše e le o mokhubedu go yena, go be go le molaleng gore mootledi o be a sa ikemišetša go ema. Koloi e putlile magahlanong a ditsela e kitima kudu moo e nyakile e thula koloi ya ka. Ge ke retologa mafelelong, ke eme ka gare ga mothaladi o serolane, ka tswalela mahlo gomme ka leboga Modimo. Le ge ke be ke se na banamedi ka koloing ya ka, ke be ke sa gonone gore go be go na le monamedi go tšwa legodimong yo a thibetšego kotsi e šoro.”

Bjalo ka Elize, Gert le Petro, Modimo o nyaka go go fodiša, go go šireletša le go go hlahla letšatši le letšatši. Theeletša mantšu a go Pesalome 91:9-10: “… ka gobane Morena ke setšhabelo sa gago, Yogodimodimo o mo dirile sebo sa gago. O ka se welwe ke kotsi, goba lapa la gago la welwa ke leuba.”

Se tloge gae goba go thoma letšatši la gago pele o kgopela Modimo go go šireletša le baratiwa ba gago. O nyaka go direla wena! Modimo a go šegofatše.