Go Thoma ka Leswa – Letšatši la 2

[Bokamorago: Morago ga thulaganyo ya go bala ye e bitšwago Mathomo a maswa … ka ntle le poifo, ke amogetše diemeile tše ntši go tšwa go babadi ba mpotša ka go katana ga bona go ka tloša poifo maphelong a bona. Sengwalwa sa lehono se tsepelela gore ke ka lebaka la eng re swanetše go tloša poifo maphelong a rena.]

Naa e sa le wa bogela papadi ya ntwa ya matswele goba ya thenisi? Go motho yo mongwe yo a sa tsebego selo ka dipapadi, papadi ya ntwa ya matswele go bonala eke ke boramatswele ba babedi ba fofafofa le go bethana ka matswele kgafetšakgafetša, goba baraloki ba babedi ba thenisi ba betha thenisi ka morero wa gore e fofe ka godimo ga nete. Ka therešo, dipapadi tše pedi ke tša gore o be le leano ka ge baphenkgišani ka dinako ka moka ba sekasekana go ka hwetša mafokodi, gore ba hlalefetšane.

Maphelong a rena, Sathane ke lenaba la rena. Go 1 Petrose 5:8 re bala gore o phaphaila bjalo ka tau ye e bopago, a lebelela ditsela tša go ka re hlasela. Kanegelo ya bophelo bja Jobo ke mohlala o mobotse. O be a na le legae le lebotse le dithoto tše ntši, bana ba bantši le tswalano e botse le Modimo. Sathane a hloile seo. Seo se bego se mo ferekanya kudu e bile gore ga go tlhaselo ye e bego e šoma, ka ge Modimo a be a šireletša lapa la Jobo le dithoto tša gagwe ka leboto la tšhireletšo (Jobo 1:10).

Jobo, le ge go le bjalo, o be a na le bofokodi. O be a tšhoga gore se sengwe se ka direga go lapa la gagwe le go dithoto tša gagwe. Sathane o bone seo gomme a re go hwetša monyetla wa go leka tumelo ya Jobo, a mmetha moo go kwešago bohloko kudu.Go Jobo 3:25, re bala mantšu a Jobo morago ga go lahlegelwa ke tšhohle: “Tše ke di boifago ke tšona tše di ntlhagelago; tše ke di tšhabago di a ntlela.”

Ke dipoifo dife tše o di hlagolelago bophelong bja gago? Naa o na le poifo ye e sego ya tlhago ya gore se sengwe se tla direga go bana ba gago goba molekani wa gago o tlo se go botegele? Mohlomongwe o boifa gore lapa la gago le ka ba kotsing ya koloi goba o tla šaparega. O a lemoga gore lenaba le lebeletše seo?

Go 2 Timotheose 1:7 re bala gore: “Gobane moya wo Modimo a re filego wona ga o re dire gore re boife; o re tlatša maatla le lerato le boitshwaro.” Go Jesaya 54:18 re bala gore: “ ‘Eupša wena ga go sebetša se o tlago hlaselwa ka sona sa go gobatša. Bohle bao ba go pharago ka molato tshekong o tla ba bontšha gore ke bona ba nago le molato. Ke ka moo ke tlago dira gore bahlanka ba ka ba bolokege, ka dira le gore ba fenye.’ O realo, Morena.”

Ge re dumelela poifo efe goba efe go ba bohlokwa go rena go go feta Modimo, re hlaselwa gabonolo ke lenaba. Go e na moo, tsepela go Modimo gomme o ikgopotše (o gopotše le lenaba) gore Jeso o šetše a fentše. Go oketša moo, ge a bea lebota la tšhireletšo go dikologa wena le baratiwa ba gago, ga go mosebe wo o tukago wo kago phuleletša bophelo bja gago! Modimo a go šegofatše.