Go Thoma ka Leswa – Letšatši la 20

[BOKAMORAGO: Ke rata go abelana ka bopaki go tšwa go babadi ba rena ba bararo ka bogolo bja Modimo.]

MMADI WA 1, Elize: “Mengwaga ye 23, monna wa ka e be e le setagwa. Se se bakile mathata a mantši lenyalong la rena. Mo mengwageng, monna wa ka o ile disenthareng tša go kgopamolla mekgwa tša go fapafapana, eupša nako le nako go be go bonala eke bothata bo a mpefala ge a tloga senthareng. Ke be ke sa kwešiše gore ke ka lebaka la eng monna wa go loka a ka senya bophelo bja gagwe ka tsela ye.

Ka Manthole 2001, ke hudugile ntlong gomme ka yo dula dikilometara tše 25 ka ntle ga toropo. Morwa wa rena, yo a bego a dira mphato wa marematlou ka nako yeo, le morwedi wa rena ba be ba dula le tatago bona. Mesong ye mengwe ka bo-05:00, ke amogetše mogala go tšwa go morwedi wa ka. O mpoditše gore monna wa ka o sepetlele ka gobane o be a hlatša madi.

Ke kitimetše sepetlele gomme ka hwetša monna wa ka a le boemong bjo bobe, ka ge a lahlegetšwe ke madi a mantši. Go ya ka dingaka, leswafo la gagwe le be le le boemong bjo hlobaetšago kudu gomme a ka be a hlokafetše mola bana ba ka ba mo hwetše ka morago ka metsotso e 30.

Ke dutše kgauswi le mpete wa gagwe gomme ka mmotšiša ge eba ga a nyake go dira Kgoši Jesu hlogo ya bophelo bja gagwe. A ka mo thuša ka bothata bja gagwe bja go nwa bjala. Monna wa ka a tšea sephetho sa go dira seo!

Modimo ga a mo fodiša fela go temalelo ya bjala, eupša gape O phološitše le go tsošološa lenyalo la rena ka mo go feletšego! Monna wa ka o na le mengwaga a sa nwe bjala. Letago ka moka ke la Modimo ka mohlolo wo o mogolo.”

MMADI WA 2, Pieter: “Nna le mosadi wa ka re ile lenyalong la bagwera ba rena ba hlogo ya kgomo kua Chrissiemeer, Mpumalanga. Moletlo o be o swaretšwe sethokgweng se sebotse sa mehlare ya mephaene ka ntle ga toropo. Ka ge go be go thabilwe letšatši leo, dipalamonwana tša monyadi le monyadiwa tša lahlega.

Le ge monyadi le meloko ya gabo ba phurupuditše kudu, balekani ba be ba swanetše go nyalana ka ntle le dipalamonwana. Morago ga moletlo, balapa le bagwera ba rapeletše tlhahlo ya Modimo mola ba le gare ba phuruputša gape sethokgwa. Gape, ba se hwetše selo.

Letšatši morago ga lenyalo, nna le mosadi wa ka re boetše sethokgweng go yo tšea diswantšho. Ke bile le boikwelo bjo makatšago bja gore re tlo hwetša dipalamonwana gomme ka re go mosadi wa ka ka go swaswa, ‘Gopola ge re ka hwetša dipalamonwana?’

Re fihlile sethokgweng gomme mosadi wa ka a thoma go tšea diswantšho tša ponagalo ya lefelo. Ke sepela-sepetše gomme ka topa phata go ka phaya bjang. Ke dirile bjalo metsotso ye e ka bago e meraro, ge ke bona se sengwe sa go gadima bjanyeng. E be e le palamonwanwa ya go thiba sefero ya Cornelia! Modimo ka nnete o re hlahlile go hwetša palamonwana!”

MMADI WA 3, André: “Ge morwa wa ka a na le ngwaga, o ile a babja kudu. Re mo išitše ngakeng yeo le semeetseng e bego e nyaka go mo robatša sepetlele. Re mo netefaleditše gore re tla mo hlokomela kudu gae. Ngaka ya dumela gore re ka sepela le morwa ka gae, eupša a nyaka go mmona letšatši le latelago go tla go mo hlahloba, ka ge boemo bja gagwe bo le kotsi.

Bošegong bjoo morago ga ge morwa wa rena a fetša go robala, re kwele gore o hema gaboima. Nna le mosadi wa ka ra khunama kgauswi le mpete wa gagwe gomme ra phuphuthela mogau wa Modimo. Ka tumelo, ra emelela, ra tswalela lemati gomme ra yo dula le morwedi wa rena wa mengwaga e senyane.

Ge re boela ka phapošing morago ga metsotso e mmalwa go yo lebelela morwa wa rena, re lemogile gore o be a hema gabotse!

Ge re mo iša ngakeng letšatši le latelago, o be a sa kgolwe gore e be e le ngwana yo a mmonego maabane. Modimo o re diretše mohlolo – ka gobane re mo tshephile ka mo go feletšego!”

Modimo o lokile gomme o nyaka go re šupetša boloki bja gagwe letšatši le letšatši. Theeletša gape mantšu go Pesalome 100:5: “Gobane Morena ke yo botho; lerato la gagwe ke la neng le neng, potego ya gagwe ke ya go ya go ile.”

A re pheleng re butše mahlo go itemogela boloki bja Modimo letšatši le letšatši maphelong a rena! O nyaka go re thuša. Modimo a go šegofatše.