Go Thoma ka Leswa – Letšatši la 19

[BOKAMORAGO: Ke rata go abelana ka bopaki go tšwa go babadi ba rena ba babedi bja tšhireletšo ya Modimo le tlhokomelo go rena lehono.]

Mmadi wa 1, Marilyn: “Morwedi wa ka ke moetapele sekolong sa gagwe sa mephato ya tlase. E tee ya mešomo ya gagwe e be e le go dirišwa ga dilo leswa. Matšatši a mmalwa a go feta, Green Leaders (sehlopha sa barutwana bao ba kgathago tema diprotšekeng tša go diriša dilo leswa) ba thomile protšeke moo ba bego ba neelana ka dipampiri tše kgomarelago le go kgoboketša materiale go tšwa go batswadi le bana gore o dirišwe leswa.
Ke šupeditše ka fao dilo di swanetšego go hlaolwa le go beakanywa ka gona go Green Leaders. Morago ga tšhupetšo, ke sepetše go ya koloing ke kgotsofetše. Gomme, ka lemoga gore dinotlelo di be di se gona ka seatleng sa ka! Ke be ke tla di hwetša kae dinotlelo gare ga mekotla e mentši ya materiale wo o tlago dirišwa leswa?
Bana ba nthušitše go lebelela, eupša ra se hwetše selo. Le ge go le bjalo, ka se tšhoge. Go be go le bjalo ka ge eka khutšo ya Moya wo Mokgethwa e tladitše pelo ya ka. Ke rapetše gore Modimo a ntlhahle go hwetša dinotlelo tša ka. Pele ke fetša go rapela, ke bone dinotlelo pele ga ka. Ke lebogile kudu ge ke lemoga gore Modimo, ka nnete, o bona tšohle tlholong ya gagwe. Re ka mo kgopela gore a re thuše go hwetša dilo tše lahlegilego! Letago ka moka ke la gagwe.”

Mmadi wa 2, Anele: “Tsebe ya ka e tee ga ekwe gabotse gomme gantši ga ke tsoše ke modumo ofe goba ofe bošego. Mesong ya Mošupologo wa go feta, le ge go le bjalo, ke tsogile ka 03:00 ke tsoša ke modumo wa mpša ye e bego e golola. Phoofolo e be e gateletšegile kudu.
Nna le monna wa ka re lebeletše ka ntle ka lefesetere la phapoši ya rena ya go robala. Mathomong, re be re sa bone selo. Gomme gateetee, re bone mpša e nnyane fase le leribiši le legolo kudu, leo e sa lego ka le bona, le le kgošana – le ikemišeditše go hlasela! Re tšwetše ntle ka lebelo go yo raka leribiši. Le fofile dimetara tše mmalwa, eupša le sa nyake go tlogela dijo tša lona tšeo le di lahletšego bjanyeng bja rena. Ke topile mpša gomme ka e tsenya ka ntlong, ke kgodišegile gore Modimo o re tsošitše go tlo phološa bophelo bja mpša.
Le ge ke be ke sa rate diphoofolo pele, nna le mpša ya ka ga bjale re monwana le lenala. Tiragalo ye e mphile kholofelo. Ge Modimo a ka tšea magato a bjalo go phološa phoofolo, ke ga kaakang moo a nyakago go re hlokomela, rena bana ba gagwe!”

Go Jobo 28:24 re bala gore, “… ka gore yena o bona mellwane ya lefase, o bona tšohle tša ka fase ga leratadima.” Go Pesalome 50:10-11 re bala gore Modimo o tseba ka phoofolo ye nngwe le ye nngwe lefaseng: “… gobane phoofolo tšohle tša sethokgwa ke tša ka, le dibata tše diketekete dithabeng. Ke tseba dinonyana tšohle tša thaba, le diphedi tšohle tša lešoka ke tša ka.”

Modimo o bona tšohle tlholong. Ke ka lebaka la eng o sa mo akaretše go dilo ka moka bophelong bja gago? Modimo a go šegofatše.