Go Thoma ka Leswa – Letšatši la 1

Naa e sa le wa ikhwetša o le tseleng nakong ya mathapama a bohlokwa a Mokibelo a papadi ya rakpi? Dinakong tše bjalo, re latela papadi ka go theeletša mogaši wa radio. Ga bjale a re re, ge papadi ya go kgahliša e fela, gateetee o kwa “Gggggg!” Go ba le tšhitišo ya sikinale ka gobane o otlela tikologong ye e nago le maswika. Go a ferekanya, ga go bjalo? Kudukudu ge sikinale ya radio e tsepama morago ga gore papadi e fele gomme ga o a kwa gore dintlha tša mafelelo ke bokae!

Khutšo le kwano maphelong a rena di ka bapetšwa le sikinale ya radio. Ka dinako tše dingwe re itemogela boiketlo le khutšo dipelong tša rena, mola re kgona go lemoga lentšu la Moya wo Mokgethwa maphelong a rena. Le ge go le bjalo, ka dinako tše dingwe, re dumelela poifo go tsena menaganong ya rena goba ra thoma go tshwenyega ka boemo bjo re ka se kgonego go bo laola. Pele re tseba, re lahlegetšwe ke khutšo dipelong tša rena gomme re katana le go kwa lentšu la Moya wo Mokgethwa – ka tsela e swango re itemogela go kgaoga ga sikinale ge re otlela tikologong ye e nago le maswika.

Maikemišetšo a lenaba ke go re utswetša khutšo. Ka lebaka la eng? Ka gobane o a tseba gore ka ntle le khutšo, re katana le go dira diphetho, re selekega ka pela gomme ka boitshwaro bja rena bja go galaka, re kgoromeletša batho kgole le rena go e na le go ba tliša kgauswi le go ba bontšha lerato la Modimo.

Lenaba le utswa bjang khutšo ya rena? Le bea mootledi yo a otlelago ka go nanya pele ga gago ka gare ga sephethephethe gore o befele. O go kgodiša gore bašomigotee ba gago ba seba ka wena (mola o le gare o katana le go se amogelwe) goba a go dire gore o nagane kudu ka polokego ya bana ba gago. Maikemišetšo a lenaba ke go thuba boiketlo le khutšo bophelong bja gago, ka ge a tseba gore e tla šitiša tswalano ya gago le Moya wo Mokgethwa.

O tsošološa bjang khutšo bophelong bja gago? Se bonolo ke go latela keletšo ya Paulose go Bafilipi 4:6-7: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

Naa ga bjale o itemogela khutšo pelong ya gago goba o dutše ka boikwelo bjo bo sa thabišego bja letšhogo le pelaelo ka gare go wena? Ke ka lebaka la eng o sa ipolele dibe tša gago le go kgopela Modimo go go thuša go hwetša nepo le khutšo ya gago? Gopola, ke Modimo fela yo a ka go neago khutšo ye e fetago kwešišo ka moka. Modimo a go šegofatše.