Go Thoma ka Leswa – Letšatši la 16

Polaseng kua Freistata moo ke goletšego gona, bjalo ka bana, gantši re be re bapala ka ntle re sa rwala dieta ka selemo. Bothata, le ge go le bjalo, bo thomile ge re nyaka go ya tšhemong gomme meetlwa mo fase gateetee ya re šitiša tseleng ya rena. Tabeng ye, re be re boela morago gae go lata dieta gore re kgone go sepela meetlweng goba go ithekga ka motho yo a bego a apere dieta go re kuka go re fetiša meetlwa, go ya moo re tla sepelago gabotse.

Bophelong, meetlwa ka dinako tše dingwe di e re šitiša tseleng ya rena – goba se sebe le go feta, o ikwa o ka re meetlwa e tsene nameng ya gago. Meetlwa e tla ka sebopego sa molekani o thata, bolwetši bjo bo utswago lethabo la gago, go duma go ba le ngwana yo e lego wa gago, bothata bja ditšhelete goba tlhohlo mošomong.

Naa o lemogile se se diregago ka gare ga dinako tše di hlohlago? Gantši re kitimela morago go Modimo. Re rapela re tlaletše, ge re lemoga gore ke Modimo fela yo a ka re neago katlego. Ge re amogela katlego, re leboga Modimo le go nea bohlatse go batho ba re phelago le bona gore Modimo ka nnete o arabile dithapelo tša rena. Nnete ke gore, meetlwa e re batametša kgauswi le Modimo le go re thuša go hwetša lerato la gagwe le tlhokomelo go rena.

Paulose o itemogetše mootlwa nameng ya gagwe. Go 2 Bakorinte 12:7-9 o ngwadile: “Fela gore ke tle ke se ikgogomoše ka tše di makatšago kudu tše ke ilego ka di utollelwa, ke ile ka kgontlhetšwa phatša nameng, phatša ye e bego e itirile moromiwa wa Sathane wa go ntlaiša gore ke fele ke ikokobetša. Ka rapela Morena gararo ke mo kgopela gore a ntlhomole phatša yeo. Yena a mphetola ka go re: ‘Kgaugelo ya ka e go lekane, gobane maatla a ka a tiile kudu mo go ba ba fokolago.’ ”

Ke efe meetlwa ye e go šitišago tseleng ya gago lehono? Gopola, Modimo a ka go kuka le go go rwala ka gare ga tlhohlo ya gago. A ka go rweša dieta maotong le go fokotša bohloko bja gago. Ka gona, a re mo lebogeng ka meetlwa ye e lego maphelong a rena. O ka gadima morago nakong ye bophelong bja gago gomme wa lemoga gore ka nnete o hweditše lerato le le makatšago la Modimo ka tsela e mpsha. Modimo a go šegofatše.