Go Thoma ka Leswa – Letšatši la 15

Ka dinako tše dingwe, ge ke bala diemeile tše ke di amogetšego go tšwa go babadi goba ke theeletša dipoledišano tša batho bao ke phelago le bona, ke na le go ipotšiša ge eba bolwetši bjo boswa bo re khukhuneditše, re sa lemoge. O ka se hwetše bolwetši bjo ka go dira diteko tša madi, eupša bo ja moya wa motho yoo ka maikemišetšo a go fediša boitshepo bja gago. Leuba – le le tsebjago ka bodutu.

Malobanyana, ke kwele poledišano moo mosadi a boletšego gore o na le go lewa ke bodutu kudu, moo a bolelago le maboto a khitšhi, gore a kwe o ka re go na le motho yo a nago le yena legaeng la gagwe. Naa o ikwa ka tsela ye lehono le gore motho o dira bjang bagwera ba baswa?

Ka 1920, mosaekholotši, George W. Crane, o rutile klase ya bošego ya barutwana bao ba bego ba dira saekholotši ya tša leago kua Yunibesithing ya Leboa-bodikela ya Chicago. Magareng ga barutwana, go be go na le lekgarebe le le bitšwago Lois. Morago ga ge Lois a amogetše mošomo kua Chicago, o tlogetše bagwera ba gagwe morago motseng o monnyane wa dinagamagaeng, Wisconsin, gomme a hudugela Chicago. Nakong ya gagwe ya go lewa ke bodutu bošego, gantši o be a ngwalela bagwera ba gawe mangwalo kua gae.

Morago ga e tee ya diklase tša bošego, o boditše Crane ka maikutlo a gagwe a go ipeela thoko. Poledišano ye e file Crane protšeke e mpsha, yeo morago a e biditšego “Setlamo sa Ditheto”. Mošomo e be e le wa nako ya matšatši a 30.

Gore ba fetše protšeke ka katlego, moithuti yo mongwe le yo mongwe o be a swanetše go bolela ditheto tša nnete tše tharo go baithuti ba bararo ba ba fapanego letšatši le letšatši. Mafelolong a matšatši a 30, moithuti yo mongwe le yo mongwe o be a swanetše go ngwala taodišo ka maitemogelo a gagwe, go akaretša: naa ditheto tša gago di hueditše bjang batho bao o phelago le bona le gore protšeke e fotošitše bjang pono ya gago ya bophelo?

Mathomong, bontši bja baithuti ba be ba se na kgahlego goba ba na le šedi ka protšeke, ka ge ba be ba boifa go se amogelwe. Le ge go le bjalo, ka moka ba be ba ikemišeditše go kgatha tema.

Ge George Crane a bala ditaodišo tše a di hweditšego go tšwa go baithuti mafelelong a protšeke, go bile le myemyelo sefahlegong sa gagwe. Baithuti ka moka ba rile ba be ba bona le go ikwa ka fao ditheto tša bona tša nnete di bilego le seabe se sebotse go batho bao ba phelago le bona. Bontši bja baithuti ba dumetše gore protšeke e fetošitše ka mo go feletšego pono ya bona ya bophelo le go batho bao ba phelago le bona.

Protšeke ye gape e fetošitše bophelo bja Lois. Ga aba motho yo a thabilego fela, eupša gape ka go diriša melawana go tšwa go “Setlamo sa Ditheto”, o dirile bagwera ba bantši ba bakaone kua Chicago go feta bao a ba šilego morago kua Wisconsin.

Naa o lewa ke bodutu lehono? E re ke go hlohleletše ka mantšu a Modimo go Baheberu 13:5: “Nka se tsoge ke le tlogetše, ebile nka se tsoge ke le lahlile.”

Thoma go nyaka menyetla ya go ka fihlelela batho bao o phelago le bona le go ba fa ditheto tša nnete. O ka makatšwa ke ka fao se se kago fetoša bophelo bja gago! Modimo a go šegofatše.