Go Thoma ka Leswa – Letšatši la 17

Nakong e fetilego, ke amogetše emeile ya go ba le linki go bidio e kopana.  Bidiong yeo, re tsebišwa, ka nako yeo, mosadi wa mengwaga ye 29, Sarah Churman, go tšwa Texas. O belegwe e le sefoa gomme morago ga opareišene, moo sethuši sa go kwa sa maemo a godimo se tsenywago ka kanaleng ya gagwe ya go kwa, mooki o dira gore sethuši sa go kwa se šome gore a kgone go kwa modumo gabotse la mathomothomo bophelong bja gagwe. Go molaleng, bidio e dira gore motho a lle.

Naa o a lemoga gore le rena ka dinako tše dingwe, bjalo ka Sarah, re itemogela bofoa bophelong? E se bofoa bja gore ga re kwe medumo, eupša bofoa go lentšu la Moya wo Mokgethwa. O nyaka go bolela le rena letšatši le letšatši, eupša ge re sa mo laletše maphelong a rena, re ka se tsebe lentšu la gagwe.

Ka mo go swanago, re ka phela re le difofu. E se difofu ka gobane ga re bone, eupša go ba difofu go mehlolo ya Modimo go rena. Go 2 Bakorinte 4, Paulose o re lemoša gore lenaba o re tswalela mahlo ka seširo go re foufatša, gore re se bone seetša sa ebangedi.

Naa o katana le go kwa lentšu la Modimo goba go bona boloki mošomong wa gagwe go wena? Theeletša mantšu a Jesu go Lukase 4:18-19 moo a tiišetšago gore ke ka lebaka la eng a tlile lefaseng: “Moya wa Morena o mo go nna; ke ka lebaka leo a mpeilego gore ke yo begela badiidi Taba ye Botse ya Modimo. O nthomile go begela dibofša gore di tla bofollwa, le difofu gore di tla kgontšhwa go bona, le go lokolla ba ba gateletšwego, le go bega gore nako ya gore Morena a lokolle setšhaba sa gagwe e fihlile.”

Jesu o re hlatswitše dibeng tša rena ge a re hwela sefapanong. Go oketša moo, morago ga thotogelo ya gagwe, o re fele Moya wo Mokgethwa bjalo ka mpho go re kgothatša le go re hlahla ka gare ga boemo bjo bongwe le bjo bongwe. Ge re laletša Moya wo Mokgethwa go ba karolo ya mpahelo a rena, re ka itemogela boikwelo bjo swanago le bja Sarah ge a ekwa lentšu la gagwe goba go bona mehlolo ya Modimo la mathomothomo.

A re laletše Moya wo Mokgethwa maphelong a rena.