Go Thoma ka Leswa – Letšatši la 14

Naa o rapelela katlego, eupša ga se o hwetše karabo ya gago ga bjale? Ge eba go bjalo, e re ke go hlohleletše ka kanegelo e latelago e bitšwago, Letlapa la Katlego:

Ka 1942, Rafael Solano o dutše godimo ga leswika moeding o omilego wa noka. Lebaka la dikgwedi, yena le bagwera ba gagwe ba nyakile ditaemane ka nokeng – ka ntle le katlego.

Ge yo mongwe wa bagwera ba gagwe ba mmotšiša ge eba o ikwa gabotse, Rafael o lebeletše letlapa ka gare ga seatla sa gagwe gomme a araba, “Ke feditše, ga go na mohola go tšwela pele. O a le bona letlapa le? Ke letlapa la 999 999 le ke le topilego ka ntle le go hwetša taemane. Ke a tlogela!”

Sehlopha sa tlhotlhomišo se be se tsepeletše go ka hwetša dika tša ditaemane tše bohlokwa kudu. Ba be ba lapile monaganong, mmeleng le maikutlong. Banna ba bangwe ba babedi ba lebeletšane ka go makala. Naa se e be e le pheletšo ya bona ya go ka hwetša ditaemane?

Morago ga nakwana, o tee wa banna bao a šišinya, “Rafael, topa letlapa la mafelelo gore e be milione!” Rafael a dumela ka hlogo, a khunama go mokgobo wa matlapa wo o bego o le pela ga gagwe gomme a kgetha le tee. E be e le le legolo go lekana le lee la kgogo. “Tšea”, a realo a le neela mogwera wa gagwe.

“Leswika leo la milione” morago la tsebja bjalo ka Molokolli , taemene e kgolo ya go hlweka ye e sa lego ya hwetšwa. Morekiši wa mabjenyabe wa kua New York, Harry Winston, go begilwe gore o lefile $200 000 go e reka.

Go ka be go ile gwa direga eng ge Rafael a se a topa letlapa leo la mafelelo goba ge Michael Jordan a tlogela kgwele-ntlatlana morago ga gore a ntšhwe go sehlopha sa sekolo se se phagamego? Go ka be go ile gwa direga eng ge Ngaka Seuss a ineetše morago ga ge bagatiši ba 23 ba ganne puku ya gagwe ya bana ya pele – yeo morago e rekišitšego dikopi tše dimilione tše tshela ke mogatiši wa 24?

Modimo o tseba ditumo tša dipelo tša rena. O laola nako le boemo bjo bongwe le bjo bongwe. Seo a se letetšego go rena ke kgotlelelo le tumelo go yena. Theeletša mantšu go Jakobose 1:2-4: “Banabešo, le itsheme ba lehlogonolo kudu ge le tlelwa ke meleko ya mehutahuta, gobane le a tseba gore go lekwa tumelo ga lena go le tlišetša kgotlelelo. Tšwelang pele le kgotlelele, ke mo le tlago ba ba ba feletšego, ba ba se nago bosodi le ba ba sa hlokego selo.”

O se ke wa felelwa ke kholofelo. Se nolege moko – le ge e le kgale o rapelela katlego. Gopola, Modimo o šoma o sa mmone go beakanya dilo ka moka maemong a tšona, gore wena o hwetše katlego. Go tseba mang, mohlomongwe, karabo ya gago e ka ba letlapa le tee la go latela, bjalo ka Rafael! Modimo a go šegofatše.