Go Thoma ka Leswa – Letšatši la 13

[BOKAMORAGO: Ke nyaka go abelana ka bopaki go tšwa go babadi ba rena ba bararo ka tšhireletšo ya Modimo le tlhokomelo go rena lehono.]

Mmadi wa 1, Anton: “Mo e ka bago lebaka la ngwaga le le fetilego ke thomile go itemogela bohloko ka gare ga tsebe ya ka. Go tloga ka nako yeo, ke etetše dingaka tša go fapafapana tše e ka bago tše šupa. Oli goba diphilisi tše ba mphilego tšona di be di e okobatša nakwana, pele ke itemogela bohloko gape. Ka ge ke le DJ ya radio, ke swanetše go apara megala ya ditsebeng letšatši le letšatši, gomme seo se gakaditše boemo. Ka go tlalela, ke tšere sephetho Lamorena la go feta go kgopela moruti le bagolo go nthapelela. Le ge ba ntloditše ka oli le go nthapelela, ga ke akwa phapano. Ba babedi ba bona, le ge go le bjalo, ba rile ba ikwa ba hlahlwa go ka mpotša gore ke thome go leboga Modimo ka phodišo ya ka – le ge ke se ka itemogela yona. Bohloko bja gakala kudu gomme ka boela morago go setsebi sa tsebe. Nakong ye, ngaka o tšere nako go hlahloba tsebe ya ka. Ka maekrosekopo wa gagwe, o be a kgona go bona go fihla go moropana wa tsebe ya ka gomme ka go makala, a hwetša gore seripa sa lešela se se ka bago se wetše ka tsebeng go tšwa go dintšha moti tše ke di šomišitšego nakong e fetilego. Ke sona se se bego se mpakela go ruruga le bohloko bjo bogolo. Ngaka ya se ntšha gomme mo e ka bago iri morago ga fao, ke be ke šetše ke ekwa gore bohloko bo okobetše. Le ge dingaka tše ntši di lebeletše ka tsebeng ya ka nakong e fetilego, go be eke Moya wo Mokgethwa, nakong ye, o hlahlile ngaka go hwetša kgwekgwe ya bothata. Thapelo ka nnete e a šoma. Letago ka moka go Modimo!”

Mmadi wa 2, Johan: “Ke mošomi wa kalafo ya tša tšhoganetšo kua Mozambique. Nako e fitilego, ke amogetše mogala bošegong bjo bongwe go tšwa go monna wa mengwaga ye 60 yo a begilego gore o kwa bohloko kgareng ya gagwe gomme a re o thatafelwa ke go hema. Ge a fihla kliniking, ke dirile teko ye nngwe le ye nngwe go hwetša sebaki. Dilo ka moka di be di le gabotse. Bohloko bja gakala gomme ke tsebile gore ke be ke swanetše go dira se sengwe ka pejana go thibela tshenyo ya nako e telele pelong ya gagwe.
Ledimo le šoro la thoma gomme la dira gore go se kgonege go ka mo fofišetša Afrika Borwa gore a yo humana kalafo. Ge dika tša monna yoo di gakala, ke rapetše Modimo ke tlaletše gore a dire mohlolo. Ke tsebile gore monna yoo o tla hlokafala ge dika tše di tšwela pele.

Modimo o kwele thapelo ya ka, ka ge bohloko bja monna yoo bo emišitše gateetee nakong ya diiri tše pedi tša go latela gomme o kgonne go robala ka khutšo. Mesong e latelago, ke hweleditše monna yoo sekgoba ka gare ga sefofane (mohlolo o mongwe) go ya go setsebi. Boemong bjoo, ke itemogetše bokgoni bja Modimo bja go ka thuša le go dira mehlolo. Se re hlokago go se dira ke go kgopela!”

Mmadi wa 3, Annalie: “Mengwaga e mmalwa ya go feta, nna le mošomi-gotee re be re le banamedi ba sefofane se se nametšago batho ba bane go tloga Boemafofaneng bja Rand Central go ya Harding. Ge re feta Vereeniging, re kwele lešata le legolo gomme sefofane sa thoma go lahlegelwa ke bophagamo. Mofofane o rile o tla leka go dudiša sefofane ka tšhoganetšo go e na le go fofa ka godimo ga Thaba ya Drakensberg.
Ge re lemoga gore re be re ya fase ka lebelo la godimo, ka llela go Modimo le go mo kgopela gore re kotame fase re bolokegile. Mofafane a bona tšhemo e tala gomme a tšea sephetho sa go kotamiša sefofane fao. Ge re swanetše re kotame fase, gateetee gwa kwagala eke motho yo mongwe o phagamiša sefofane le go se dira gore se kotame dimetara tše mmalwa go e na le fao.
Re tšwile sefofaneng go hlahloba tshenyo; re lemogile gore re nyakile re thula maswika a magolo. Semaka sa rena sa go latela: “tšhemo e tala” ye re bego re nagana gore go bolokegile go kotama go yona, e be e tletše ka maswika. Ge re ka be re kotame fao, sefofane se ka ba se thubegile! Letšatši leo, ka moka re lemogile gore Modimo o re šereleditše. O re kukile gomme a re thuša gore re kotame re bolokegile!”

Anton, Johanese le Annalie ba nepile. Modimo o nyaka go re thuša – se re hlokago go se dira ke go mo kgopela thušo. Theeletša mantšu go Mateu 7:7a: “Kgopelang, gomme le tla fiwa.” Go Jakobose 4:2b go ngwadilwe: “Ga le hwetše se le se nyakago, ka gobane ga le se kgopele go Modimo.” Go Markose 11:24 re bala gore:“Ka lebaka leo ke le botša gore tšohle tše le kago di kgopela ka thapelo, le dumele gore ruri le tla di fiwa, gomme le tla di fiwa.”

Ke eng seo se go tshwenyago lehono? Ke ka lebaka la eng o sa boledišane le Modimo ka taba yeo? Modimo a go šegofatše.