Go sepela le Modimo – Letšatši la 9

Go lehlogonolo motho yo a ikhweletšago bohlale, yo a ikhweletšago kwešišo … Bo go fa bophelo bjo botelele ka letsogo la go ja, mme ka la nngele bja go fa mahumo le tlhomphego. Diema 3:13,16

Lapa le lehumo ke bohwa bja go tšwa go batswadi ba motho, mosadi wa go loka yena o tšwa go Morena. Diema 19:14

Ka moka re dira dilo tša bošilo ka dinako tše dingwe, tšeo re itsholago ka tšona, eupša ge re lemoga diphošo tša rena, le go leka go se di boeletše, se se matlafatša kwešišo ya rena, yeo e golago go ba bohlale ge re gola. Bibele e bolela kudu ka bohlokwa bja bohlale gomme lehono re bolela ka bohlokwa bja bjona ditirong tša Abigaile le monna wa gagwe, Nabale, ge ba kopana le Dafida pele a e ba kgoši.

“Lapa le agwa ke mosadi yo bohlale, wa lešilo yena o ithubela lona. Mohlokabosodi o boifa Morena, wa tselakgopo yena o a mo nyatša. Lešilo le ipolaya ka dipolelo tša lona, yo bohlale yena o itšhireletša ka tše a di bolelago” (Diema 14:1-3). Re bona ka fao mantšu a go Diema a diregago bophelong bja Nabale, yo a bego a tsebega ka go ba lešilo le gore Abigaile, yo mantšu a gagwe a bohlale le ditiro tša gagwe tša ka pela di phološago monna wa gagwe, ge ka pefelo le boikgogomošo a gana go thuša Dafida (1 Samuele 25:14-20).

Le ge Nabale a be a humile le dinala, o ile a gana go nea Dafida le banna ba gagwe dijo morago ga ge ba mmontšhitše botho ka go hlokomela badiši ba gagwe kua Karmele. Tshwaro e mpe e dirile gore Dafida a tuke bogale gomme e ka ba e dirile gore a bolaye Nabele, eupša a go lebogwe kgato ya kapejana ya Abigaile. Abigaile o lemogile kotsi ye e bakilego ke Nabale ka go hloka tebogo le mantšu a gagwe a bogale, gomme a lokiša boemo ka go yo bolela ka go ikokobetša le go kgodiša go Dafida. O tšere dipokolo, a di rweša dijo, gomme a di iša go Dafida le banna ba gagwe. Ditiro tša gagwe di thibetše kotsi. “Dafida a re go yena: ‘A go retwe Morena Modimo wa Israele, yo lehono a go rometšego go tlo nkgahlanetša! A Modimo a go šegofatše ka lebaka la ge o gopotše gabotse, le ka lebaka la seo o se dirilego lehono ka go nthibela go oba molato wa go tšholla madi, le ka go nthibela go itefeletša ka bonna.’ ” (1 Samuele 25:32-33)

Bohlale bja Abigaile bo mo kgontšhitše go kwešiša le go godiša khutšo, yeo e phološitšego monna wa gagwe le banna ka moka bao e lego ba gagwe. Modimo o kgonne go šoma ka boitshwaro bja gagwe, eupša ka morago a bolaya Nabale yo a bego a sa iše felo ka batho ba bangwe, yo a bego a tagilwe ge Abigaile a boa gae go tšwa go Dafida. Abigaile ka morago e bile mosadi wa Dafida.

Batho ba bohlale ba hlagolela dipharologantšho tša semelo se sebotse ka boikemišetšo bja bona bja go ithuta. Temogo, boitshwaro le boikokobetšo di gola ka gare go bona, le go hlama botumo bja bona bjo bobotse; eupša lešilo ga le nyake go fetoša monagano wa lona gomme seo se baka go phuhlama ga lona. Ka go bušeletša diphošo, re gana go amogela boikgogomošo le go sola Modimo le ba bangwe ka mathata a rena, re itlhlolela maphelo a a sa goketšego. Boikokobetšo bo fenya bošilo gomme go ikemišetša go hwetša bohlale bja Modimo ka lentšu la gagwe, bo humiša bophelo.