Go sepela le Modimo – Letšatši la 10

“Gobane le ge o ka no ikhomolela gonabjale, Bajuda ba tla thušwa ke legodimo ba phologa; eupša wena o tla hwa, gomme lapa la tatago la felelela. Gomme go tseba mang – mohlomongwe bohumagadi o bo beetšwe yona nako ye!” Estere 4:14

Mantšu a a hwetšwa ka pukung ya Bibele yeo e sa bolelego ka leina la modimo, gomme ke ye nngwe ya dipuku tše pedi fela ka Bibeleng tše di bitšwago ka leina la mosadi. Le ge go le bjalo, ke kanegelo ya go kgahliša ya ditiragalo tše makatšago moo Modimo a šomago ka mohlolo maphelong a batho ba gagwe go ba phološa. Modimo o tutuetša Estere, ka tumelo ye bonolo, yo a thušitšwego ke motswala wa gagwe Mordekai yo a mo godišitšego bjalo ka morwedi wa gagwe morago ga lehu la batswadi ba gagwe, go šomiša ditlhohlo tše ba bego ba lebeletšane le tšona go fenya bobe.

Bala puku ye ya go kgahliša go bona ka fao Modimo a šomago ka sebete sa gagwe le bohlale. Estere ke lekgarebe la Mojuda, le lebotse ka sebopego le semelo, leo le thopago pelo ya Kgoši Zerksese wa Persia yo a mo dirago kgošigadi; eupša ga a ikgogomoše gore a lebale yo a lego yena. Ge a ekwa ka leano la Hamane la go fediša Bajuda, thekga batho ba gabo, a bontšha go kgathalela tšhireletšo ya bona gomme, ka go latela keletšo ya Mordekai, o šomiša maemo a gagwe a go ba kgošigadi gabotse.

Ka tšhošetšo ya go bolaiwa e le godimo ga gagwe, Estere o lokišitše ka tlhokomelo leeto la go ya kgahlanong le molao gomme a ya go kgoši, a sa bitšwa, go bolelela batho ba gabo. O itimile dijo le meetse matšatši a mararo, eupša a dira gore Bajuda ba dire bjalo, ba bontšha gore ka moka ba llela phološo ya Modimo. “Sepela o bothe Bajuda ka moka ba ba lego motseng wa Susa. Le itime dijo ka lebaka la ka. Le se je, le se nwe matšatši a mararo le mašego a ona. Le nna gotee le badiredi ba ka ba basadi re tla itima. Ka morago ga moo ke tla ya go kgoši, le ge molao o gana. Ge eba ka go dira bjalo ke tla hwa, gona ke tla no hwa.” (Estere 4:16)

Ka kgaugelo ya Modimo, ga se a hwe. Go e na le moo, Estere o gaugetšwe ke kgoši ge a mo šupa ka molamo wa bogoši; eupša Hemane, lenaba la Bajuda, o fegilwe ka lona letšatši leo a bego a rulagantše go ba fediša. “Morena Modimo wa lena o ya le lena, mme o tla dira gore le fenye.” (Doiteronomio 20:4)

Sebete sa Estere le tumelo di bolela le rena lefaseng la rena lehono, moo Modimo a re bitšago go rata ba bangwe bjalo ka ge re ithata, go bontšha gore o ka gare go rena le go dira legatong la bao ba hlokago, go sa šetšwe bogolo, bong, morafe goba setšo, kgahlanong le diphošo le go hloka toka tše di dirwago ke setšhaba.

Naa re tla araba pitšo ya gagwe?