Go sepela le Modimo – Letšatši la 15

Yena o be a khunamela Modimo, gomme Morena a mo fa gore a ele tše Paulose a di bolelago hloko. Ge yena le ba lapa la gagwe ba seno kolobetšwa, o ile a re mema a re: “Ge eba le mpona ke le modumedi wa Morena, a re yeng le yo dula ka ga ka”. Ditiro 16:14-15

Go ba mogwebi le go ba le kgwebo ye e lego ya gago go kgauswi le dipelo tša batho ba bantši lefaseng lehono. Go ka ba selo se sebotse seo ka sona o ka golago le go se šomiša go hola ba bantši – ke se o se dirago ka sona seo se lego bohlokwa. Re bona ka fao Petrose a atlegilego ka go latela Jesu, le semeetseng a tlogela kgwebo ya gagwe ya go rea dihlapi ge A mmitša. Lehono, re tlo bolela ka seabe sa ebangedi bophelong bja mosadi wa kgwebo kua Filipi.

Leetong la boromiwa la bobedi la Paulose le Silase, Paulose o bile le pono ya monna wa Matsedonia a mo rapela go selela ka Matsedonia go ba thuša gomme a tšea sephetho sa gore Modimo o be a mmitša fao go yo bega ebangedi (Ditiro 16:9). O ile Matsedonia le Silase, Timotheose le Lukase, gomme ba dula matšatši a mmalwa kua Filipi. Mathomong a go bega ebangedi fao, o phološitše motho fao, yo ge e le gabotse e bego e le motho wa pele wa Yuropa wa go phološwa, yoo kgwebo ya gagwe e butšego tsela go bodiredi seleteng seo, ka lebaka la seabe se ebangedi e bilego le sona go yena.

Lidia, wa go tšwa Tiatira, e be e le mmapatši wa lešela la bohwibidu bja moretele gomme a khunamela Modimo wa Bajuda. E be e le yo mongwe wa sehlopha sa basadi bao ba bego ba bokane ka Sabatha go rapela ka ntle ga dikgoro tša motse, moo Paulose le bagwera ba gagwe ba bego ba le gona ka kholofelo ya go hwetša sinagoge. (Bodumedi bjo bo bego bo sa tsebje bo be bo sa dumelelwa go begwa motseng.) Paulose o begile ebangedi go sehlopha, a ba botša ka phenyo ya Jesu go sebe le lehu ka lehu la Gagwe le tsogo, gomme Lidia a dumela.

Le ge a be a dumela go Modimo, o be a nyaka kwešišo ye e tseneletšego ya gagwe gomme a hwetša tlhoko ya gagwe ka ebangedi. Molaetša wo o fetošitše bophelo bja gagwe. Ga a kolobetšwa fela, eupša o tlišitše maloko a mangwe a legae la gagwe gore le bona ba kolobetšwe. Gomme, a tletše ka lethabo le tebogo go Modimo, o memile Paulose le bagwera ba gagwe go dula ka legaeng la gagwe ge ba le Filipi, ka tsela ye ba bego ba ka se gane: “Ge eba le mpona ke le modumedi wa Morena,” a realo, “a re yeng le yo dula ka ga ka.” (Ditiro 16:15)

Ba amogetše kgopelo ya gagwe gomme ka morago, kereke ye mpsha e tšwetše pele go kopanela ka ntlong ya gagwe (Ditiro 16:40).