Go sepela le Modimo – Letšatši la 13

Mošemanyana Samuele yena o ile a tšwela pele le go hlankela Morena, a apara seaparo se sekgethwa sa lešela. Ngwaga ka ngwaga mmagwe o be a mo rokela seaparwana mme a mo išetša sona ge a eya le monna wa gagwe go yo dira sehlabelo sa ngwaga wo mongwe le wo mongwe. 1 Samuele 2:18-19

Go na le selo se kgethegilego kudu le go kgoma maikutlo ka tlhalošo ye ya Samuele yo monnyane a hlankela Modimo ka tempelng. Mohlomongwe, go fihla bokgoleng bjo itšego, ke ka gobane re tseba kudu ka fao Hanna a hlologetšego le go rapelela ngwana yo o mmotse, gomme re ka nagana ka lerato le boikgogomošo bjo a bego a na le bjona ge a dira seaparo ngwaga ka ngwaga; eupša mohlomongwe lehlakore la nnete ke bogolo bja mošomo wo a bego a o dira a hlokometšwe ke Eli, ka ge a be a “hlankela Morena” (1 Samuele 3:1), moprista yo monnyane.

Bana ba bannyane ba ka ikgafa go mošomo o bohlokwa gomme re ka ba le digopotšo tše kgethegilego tša bana ba rena ba rwetše diputsu tša sešole tša tatago bona goba dikwaikwai tša mmago bona, ba “lokiša” ketlele goba ba huduba sopo, ka tlhokomelo bjalo ka batho ba bagolo; ka gona, Samuele, yo a godišitšwego ka ntle le ditšhitišo le go belega ka lebaka la dithapelo tša phišego, “a fela a gola mme a ratwa ke Morena le ke batho” (1 Samuele 2:26).

1 Samuele 3:1 e re, “Mehleng yeo, ge mošemane Samuele a hlankela Morena a hlokometšwe ke Eli, melaetša ya Morena e be e se ye mekae, le dipono tše di tšwago go yena di bonwa ka sewelo,” eupša bošego bjo bongwe Samuele o kwele Modimo a mmitša. Modimo o tšweletše go yena gomme a mmotša ka pefelo ya gagwe kgahlanong le lapa la Eli le kahlolo ye a bego a tla e diragatša go se kgale. Go bile mošomo o mogolo kudu go Samuele go botša Eli ka kahlolo e sehlogo go tšwa go Modimo, eupša ka ntle le pelaelo e bontšhitše boikgafo bja gagwe go Modimo. Go tloga moo go ya pele, Samuele o tsebilwe bjalo ka mohlanka wa Modimo go Israele ka moka gomme a ithuta tše ntši ka Modimo ge a itšweletša go yena ka lentšu la gagwe. “Samuele a gola, Morena a ba le yena mme a dira gore tšohle tše Samuele a di bolelago di phethege.” (1 Samuele 3:19)

Lehu la Eli le barwa ba gagwe, bao ba bego ba sa hlomphe Modimo moo e lego gore ba tlošitše Polokelo ya Kgwerano go tšwa ka Felo mo Gokgethwakgethwa ba ya le yona ntweng, go fedišitše nako ya leswiswi, ya go hloka thulaganyo ya baahlodi le go bula tsela ya bodiredi bja Samuele go Baisraele, gomme go dirile gore batho ba khunamele Modimo gape. Samuele o ba neile ditlhahlo tše kwešišegago ge Baisraele ba be ba sokologa le go nyaka Modimo. Gape o be a ba rapelela go Modimo le go ba eta pele ka potego: “Ge le tloga le sokologela go Morena ka dipelo tša lena ka moka, gona tlošang medimo e šele ka moka le diswantšho tša Astarte, modimo wo motshadi. Dulang le ineetše Morena mme le khunamele yena a nnoši, gomme o tla le phološa diatleng tša Bafilista.” (1 Samuele 7:3)

Bophelo bja Samuele bo bontšha bohlokwa bja go beela ka thoko merero ya Modimo. Tswalano ya gagwe ya kgauswi le Modimo go tloga bjaneng e ile ya mmopa ge nako e dutše e eya go ba moprista, moahlodi, moprofeta le moeletši go batho; Modimo gape o mo kgethile go yo tlotša dikgoši tše pedi tša pele tša Israele, Saulo le Dafida. Bophelong bja gagwe ka moka, o ile a tsepelela ka go se šišinyege go Morena le go hlankela ka potego le go obamela go tšohle.