Go sepela le Modimo – Letšatši la 12

Josefa e be e le monna wa go phetha melao ya Moshe, eupša o ile a se ke a rata go goboša Maria phatlalatša; ka gona a ikemišetša go mo tlogela ka go ngwega. Ge a sa gopodišiša taba yeo, morongwa wa Morena a tšwelela go yena torong, a re go yena: “Josefa, setlogolo sa Dafida, o se ke wa boifa go nyala Maria, gobane o imišitšwe ke maatla a Moya wo Mokgethwa.” Mateu 1:19-20

Ditemana tša ka godimo di utolla dilo tše tharo ka Josefa, monna yo Modimo a mo kgethilego go ba tate wa lefaseng wa Morwa wa gagwe. E be e le “monna wa go loka”, o be a na le tlhago ya go naganela ba bangwe gomme o be a ikarabela go tlhahlo ya Modimo bophelong bja gagwe. Dipharologantšho tše di bile le khuetšo ye botse bophelong bja Jesu. Seo ditemana di sa se utollego, le ge go le bjalo, ke gore o be a le wa lešika la Dafida.

Lešika la Mateu “la boJesu Kriste, setlogolo sa Dafida, yo e bego e le setlogolo sa Abrahama …” (Mateu 1:1), leo le felago ka “… Jakobo a tswala Josefa, monna wa Maria, mmagoJesu yo a bitšwago le ka la Kriste” (Mateu 1:16), ke bohlatse bja go kgahliša bja leano la Modimo le phethagatšo ya seprofeto, le bontšha ka mo go feletšego ka fao Joesefa a swanelago ke tema ya gagwe ye bohlokwa bjalo ka tatago Jesu wa lefaseng.

Bibele e re botša gore “Maria, mmagwe, o be a beeleditšwe ke Josefa; eupša ya re pele ba nyalana, Maria a lemoga gore o imišitšwe ke maatla a Moya wo Mokgethwa” (Mateu 1:18). Re kwešiša ditlamorago le gore ke ka lebaka la eng tlhalošo ya Maria e ka ba e be e gakantšha Josefa, mohlomongwe e mo kweša bohloko. Le ge ba be ba beeletšane, ka molao wa Sejuda, go be go le kontraka ye e lego molaong ye e lego gore ke lehu fela goba tlhalo ye e ka e fedišago gomme seotswa se be se kgatlwa ka maswika. Ka lebaka la ge a mo hlompha, o tšere sephetho sa gore o tla mo hlala ka sephiring, gore a se mo goboše le go tlontlolla seriti sa gagwe.

Gomme, Modimo a tsena dilo gare: morongwa a tšwelela go Josefa torong gomme a tiišetša gore Maria o boletše nnete. Josefa o be a ikemišeditše go mo thekga go sa šetšwe boemo bjo bo raraganego. Go bulegela ga gagwe go Modimo go bile bohlokwa kudu. Go ba phološitše ka nako yeo, le go ba phološa ka morago ge Josefa a etelwa ke morongwa gararo ditorong, lekga le lengwe le le lengwe a tliša tshedimošo e bohlokwa mabapi le polokego ya Jesu le go pheleng gabotse ga gagwe, go hlatsetšwa ke ge ba be ba swanetše go tšhabela Egepeta gomme ka morago, gore ba boe neng ba boele kae (Mateu 2:13,19,22).

Potego ya Josefa le ditekanyetšo tše maatla tša boitshwaro ka go dira se a se holofeditšego Maria, le go mo thekga ge a lebeletšane le mahlabišadihlong, di bolela le rena lehono ka tlhokomelo ya Modimo le thato go motho yo mongwe le yo mongwe. Bjalo ka bana ba Modimo, le rena re swanetše go phela maphelo potego moo ka nnete re godišago seriti sa batho ka moka.