Segwera – Letšatši la 4
Rute le Naume – potego ya go ikgafa ya Rute
(Di)temana ya Bibele
RUTE 1
Matšatšing a lehono, dikanegelo tše ntši ka bommatswale ga se tše botse! Go na le metlae ka go kgotlelela motho ka gore o swanetše go dira seo, e se gore o dira maiteko a go ikgetha ka gobane o nyaka. Polelong ye e botse ya boikgafo le potego go Naume, boitshwaro bja Rute go mmatswale wa gagwe bo fapana kudu. Potego ya gagwe go Naume e feta kudu ye e nyakegago go yena bjalo ka moloko ka lebaka la lenyalo.
Naume o file Rute karata ya mahala ya go tšwa kgolegong. O be a ka dira se Orpa a se dirilego gomme a boela morago go batho ba gabo, go sena yo a ka naganago dilo tše mpe ka yena. Le ge go le bjalo, lerato la Rute go Naume le Modimo wa gagwe le mo ganetša go furalela mmatswale wa gagwe.
Mohlomongwe, Rute o akanya ka fao mengwaga ye lesome go Naume e bego e le thata ka gona kua Moaba. O lemoga gore mmatswale wa gagwe o feditše mengwaga ye lesome kgole le gae, mošele nageng e šele yo a kwešitšwego bohloko kudu ke go lahlegelwa ke monna le barwa ba gagwe. Rute o a tseba gore ge a ka dula le Naume, dilo di tla fetoga – e tla ba mošele, e tlaba yena yo a tlogetšego batho ba gabo. Le ge go le bjalo, ga a ineele. O ikemešeditše go ba ka gare ga mathata a go swana le a Naume a bilego ka gare go wona, go kgatha tema ditlaišegong le mahlokong a gagwe. Go molaleng gore Rute o ratile Modimo wa Naume gomme o tlogetše medimo ya Moaba go hlankela Modimo wa nnete.
