Segwera – Letšatši la 3

Ke ye nngwe ya dikanegelo tše di tsebjago kudu tša potego le lerato – kanegelo ya Naume, mosadi wa Moisraele yo a gapeletšegilego go yo dula Moaba ka lebaka la tlala e šoro nageng ya gabo, le ngwetši ya gagwe ya Moaba, Rute. Sa pele, monna wa Naume, Elimeleke, o a hlokafala gomme barwa ba gagwe ba babedi ba a hlokafala. Ga bjale, le ge go le bjalo, tlala kua gae e fedile gomme o tšea sephetho sa go boela Juda, eupša o ba le bothata.

Go ya ka melao ya kgale ya lenyalo ya Seheberu, ge monna yo a nyetšego a hlokafala, morrwarrago monna yoo o swanetše go nyala mohlologadi gomme a mo tsošetše lapa, go e ra gore bana ka moka bao ba belegwago lenyalong le leswa ba tla balwa bjalo ka ditlogolo tša monna yo a hlokafetšego. Morwa wa pele, lenyalong le, o tla ba le tokelo ya bogolo ya go ba morwa wa pele wa monna yo a hlokafetšego, gomme o tla hwetša bohwa bja dithoto ka moka le ditokelo tšeo e bego e le tša tatagwe yo a hlokafetšego.

Setšo se se be se netefaletša tšhireletšo ya mohlologadi, yo mogongwe a ka bago a tlogetšwe a sena bagwera le go diila. Molao gape o hlalošitše gore ge go be go se na morwarre, monna wa leloko wa kgauswi o be a swanetše go nyala mohlologadi.

Gore Naume a be le ditlogolo le gore a hlomphiwe, o be a swanetše go netefatša gore betši ba gagwe ba nyala monna wa moloko wa kgauswi le monna wa gagwe. Le ge go le bjalo, ga a na monna wa moloko wa kgauswi le monna wa gagwe. Naume o lokolla Orpa le Rute go tlemo ye. Ka go nyaka gore ba phele gabotse, o ba botša gore ba boele gae go yo dula le batho le malapa a gabobona kua Moaba.

Seo e ka ba e be e se sephetho se bonolo go se dira – go gafa bokamoso bja gagwe ka lebaka la betši ba gagwe, bao e bego e le bagwera ba nnete gape. Gosasa, re tla bala ka fao Rute le Orpa ba iphetoletšego ka gona.