Segwera – Letšatši la 19

Kanegelo ya Maria le Marta e a tsebja – basadi ba babedi bao ba ikarabetšego ka go fapana go Jesu. Bobedi ga bona e be e le bagwera ba Jesu. O tlile legaeng la bona. Ba be ba eja mmogo. Ba boledišana.

Letšatšing le le ge go le bjalo, Marta a befela. Re botšwa gore e be e le legaeng la gagwe, go na le kgonagalo ya gore e be e le yena yo mogolo go sesi wa gagwe. O be a na le maikarabelo a gore tšohle di beakanywa gabotse gomme o be a tla lewa ke dihlong setšhabeng sa gabo ge kamogelabaeng e be e se e botse. Lukase o re botša gore o be a šitišwa, ka gona re kwešiša gore o be a nyaka go theeletša Jesu, eupša go be go na le motho yo a swanetšego go netefatša gore bohle ba a ja! Ka ntle le moo, o be a swanetše go šireletša botumo bja gagwe. Nka nagana lehloyo la Marta le oketšega ge a eme kgauswi le dipitša tše di fufulago. Mafelelong, a bolela ka bogale: “Morena, na kgane ga o na taba le ge yo ngwanešo a ntlogetše ke šoma ke le noši? Gape mmotše a tle a nthuše!”

Go e na le go thabiša Jesu ka go hlankela ba bangwe, go bonolo kudu go tsena molabeng wa go thabiša rena, re nyaka ditheto le go amogelwa. Ge re sa kwešiše seo, go ka se tšee nako gore re thome go hloya Modimo ka boyena. Re thoma go ipotšiša ge eba ka nnete o a re rata le gore ke ka lebaka la eng a sa re thuše ka mo re nyakago ka gona. Go oketša moo, seo se palediša segwera sa rena le bana ba borena go Kriste, gape le Jesu.