Segwera – Letšatši la 13

E tee ya dikanegelo tše tsebjago kudu mabapi le segwera, Bibeleng, ke kanegelo ya Jonathane le Dafida (1 Samuele 18 – 20). Morago ga go fenya Goliate go 1 Samuele 17, Dafida e ba karolo ya lapa la ka bogošing. Saulo o enne gore morwedi wa gagwe o tla nyala ke monna yo a bolayago mogale wa Bafilista, ka gona Dafida o nyala morwedi wa Saulo. Bjalo ka karolo ya lapa la Saulo le mošate, Dafida o fetša nako e ntši a na le morwa yo mogolo wa Saulo, Jonathane.

Go sa šetšwe bokamorago bja bona bjo fapanego, bjalo ka modiši le kgošana, Dafida le Jonathane ba ikhweditše ba na le dilo tše ntši tše di swanago – pono e swanago, morero o tee, ba dumelelana – tšeo di dirilego gore ba batamelane kgauswi kudu. Go feta moo, se se be se bontšhwa ke lerato la boikgafo; ba be ba ratana kudukudu bjalo ka ge ba ithata bona beng. Yo mongwe le yo mongwe wa bona o be a bea yo mongwe pele. Temana ya 4 e re botša gore Jonathane o apotše seaparo sa gagwe sa bogoši gomme a se fa Dafida, gotee le seaparo sa gagwe sa boitšhireletšo le yona tšhoša ya gagwe le bora le lepanta. Ka mantšu a mangwe, Jonathane ka go ithaopa a beela thoko dišupo tša maemo a gagwe bjalo ka kgošana ye e tloditšwego ya Israele gomme a di fa Dafida.

Lerato la mohuta wo le ka bonwa gape go 1 Samuele 23:17. Moo, Jonathane o utollela Dafida gore o a tseba gore Dafida o tlo dula setulong sa bogoši sa Israele a hlatlama Saulo. Le ge go le bjalo, Jonathane ga a hufagele Dafida. O ikemišeditše go thekga Dafida, le ge Dafida a ka dula setulong seo e swanetšego go ba e le sa gagwe. Se ke se seswantšho sa boikgafo bjo bo se nago boithati!

Naa o ka gwerana le motho yo a fiwago maemo a tlhompho le bohumi tšeo di bego di swanetše go ba tša gago?