Ditswalano – Letšatši la 5

T.S. Elliot o ngwetše: “Lelapa ke lefelo moo ditsela tša bana tša bophelo di thomago. Fao tshepelo le tlhago ya tsela di a rulaganywa.” Diema 22:6 e tiišetša mantšu a gagwe: “Ruta ngwana tsela ya go phela, gomme bophelong bja gagwe ka moka a ka se e lahle.”

Motheo wa tlhabollo ya semoya le kgolo o ka gare ga tswalano ya rena le Modimo: “Lena Baisraele, gopolang gore Morena Modimo wa rena ke yena Morena a nnoši. Rata Morena Modimo wa gago ka pelo ya gago ka moka, le ka moya wa gago ka moka, le ka maatla a gago ka moka” (Doiteronomio 6:4-5). Ka gare ga lapa, molao o ke tiro ya go gola mmogo: batswadi ba swanetše go hlahla bana ba bona go tswalano ya go ikgetha le Modimo. Doiteronomio 6:7-9 e re ruta ka fao: “O di toutele bana ba gago. O bolele ka tšona ge le le gae le ge le le leetong, ge le khutša le ge le šoma. O di tlemelele matsogong, o di rwale le phatleng e le segopotšo. O di ngwale direpoding tša mejako ya ngwako wa gago, le dikgorong tša gago.”

Ge re rapela mmogo, re gola kgopolong ya gore re ithekgile go Motho yo mogolo le yo maatla go feta rena. Ke temogo ya mohlakanelwa ya gore Modimo ke Mothuši, Moabedi, Mophološi – ka nnete, Yena yo e lego Yena – O dula magareng ga batho ba gagwe. Dithapelo tša rena tša tumelo go Modimo di dira gore letsogo la gagwe le sepele. Ge re rapelela manaba a rena, re ba rola dibetša; ge re rapelela bao re ba ratago, re a ba šireletša le go ba matlafatša; gomme ge re rapelela baetapele ba rena le batho bao ba lego maemong a phagamego, go re kgontšha le rena: “… gore re tle re phele re wele dipelo re iketlile, re le ba borapedi bja nnete, le maitshwaro a a swanelago” (1 Timotheose 2:2).

Motho mang le mang o na le maikutlo. Lege go le bjalo, ka fao re šoganago le boikwelo bjo bo itšego ka nako ye e itšego go na le bokgoni bja go ka tliša batho kgauswi le ba bangwe goba go ba aroganya. Jesu o tsebagatša lerato la Gagwe go barutiwa ba Gagwe le go le šomiša bjalo ka mohlala wa ka fao re swanetšego go ratana: “Ke le fa molao wo mofsa, wa gore le ratane. Bjalo ka ge ke le ratile, le lena le rataneng” (Johanese 13:34). Le ge re galefile “… le gona letšatši le se ke la le sobelela le sa galefile” (Baefeso 4:26).

Jesu o bolela ka karolo ye nngwe ya go gola: “Ruri, ke a le botša, ge le sa fetoge la ba bjalo ka bana, le ka se tsoge le tsene mmušong wa Modimo” (Mateu 18:3). Batho ba bagolo ba swanetše go ela šedi ditiro tša bana, ba bale Lentšu gore ba dira seo bjang, gomme ka go rapela ba kgopele Moya wo Mokgethwa go utolla dipharologantšho tšeo tša bana tšeo A di ratago kudu. Gomme, ka thušo ya Moya wo Mokgethwa, re swanetše go hlahla maphelo a rena re lebile moo.