Ditswalano – Letšatši la 4

Mehleng ya rena, go ja dijo mmogo ke go feta go kopana gomme ra ja dijo. Ke boitemogelo, leeto le le thomago lefelong la moo o jago, le le elwago ke seo o se jago, boleng, le seabe sa dijo tše dingwe le tše dingwe go dikwi tša tatso le le felelago ka go phumula molomo wa gago ka mo sa lemogegego. Kholego ye e swarelelago, ye e tseneletšego ya boitemogelo bjo bjalo ke ge go ipshinwa ka dijo le go di abelana le barati ba bangwe ba dijo.

Dijo dinakong tša Bibele di thekga bohlokwa bja ditswalano go dijo. Dijo e be e le sešupo sa tshepo, borwarre le go abelana karolo ya maphelo a batho. Lega go le bjalo, ka mehla go na le maemo a a fapanego. Bjalo ka Jakobo yo a apeetšego morwarragwe Esau setopša gore a mo fe tokelo ya bogolo bja gagwe (Genese 25:33-34). Ga go a felela fao – o ile a radika tatagwe Isaka. A apere bjalo ka Esau, a apeela tatagwe dijo tša gagwe tša mmamoratwa gore a kgone go hwetša tšegofatša ye e lebanego mogolwane wa gagwe. Dinakong tša sebjalebjale, ge batho ba nyaka go šomiša batho go ikhola, re ka re boJakobo ba mema boEsau dijong tša bona.

Go se botege! Kudukudu ge go elwa ka ditšhušumetšo tša Jesu tše di nago le go ikhola. O be a rata go boledišana le batho ba le gare ba eja dijo – e se fela le batho ba bohlokwa ba go tuma, eupša gape le bagwera, balahlwa le mašaba.

Nakong ya ditiragalo tše O rerile tsela ye mpsha ya go phela: Ka ntle le go dikadika a bolela ka ditaba tše itšego tša leago; A ruta ka Mmušo wa Modimo le go lebalela batho dibe tša bona. Pelo ya Gagwe e be e le ya batho gomme tsela ye e amogelegilego ya go ipatametša kgauswi le dipelo tša bona e be e le ka tsela ya go ja le bona dijo. Ga go makatše ge A imemile ntlong ya Sakiose go yo ja dijo le yena: “Sakiose, fologa ka pela, gobane lehono ke swanetše go yo hlwa ka ga gago” (Lukase 19:5). Bophelo bja Sakiose bja fetoga kudu nakong ya ge ba e ja dijo. Mosadi yo a imemilego dijong tša mantšiboa yo a hlapišitšego maoto a Jesu ka dikeledi tša gagwe, a a phumola gomme a a tloša ka makhura, o sepela a na le kholofelo: “Tumelo ya gago e go phološitše; sepela gabotse” (Lukase 7:50).

Ka kerekeng go Ditiro, badumedi ba be ba eja mmogo bjalo ka batho ba boemo bjo bo swanago ka gobane badiidi le bahumi ba be ba abelana dijo le tumelo ya bona – ba be ba na le botee bjalo ka Bakriste. E be e le tlhagišo ya tumelo ya bona ye mpsha le go ratana. Ke ipotšiša gore: ekaba se ga se ka tsela ye mohlomongwe re ka go hlohleletša setšhaba sa rena sa sebjalebjale go ba setšhaba se se hlokomelanago? Mohlomongwe Paulose le Petrose ba be ba na le se kgopolong ya bona ge ba ngwala gore “… abelane le badumedi ba ba di hlokago; le thakgalele go amogela baeti” (Baroma 12:13) le “Le amogelaneng ka magaeng a lena le sa ngongorege” (1 Petrose 4:9).