Ditswalano – Letšatši la 18

Go obamela Modimo go pelong ya tswalano ya modumedi le Yena. E otulla gore ke mang a nago le lefelo la tlhompho bophelong bja yo mongwe le gore ke mang yo a amogelago lerato la yo mongwe le boikgafo.

Kakaretšo ye kopana ya Moshe mabapi le se se diragetšego go Israele lešokeng e gatelela bohlokwa bja go obamela Modimo, eupša gape e bontšha tše e lego ditlamorago tša go se obamele (Doiteronomio 1:21-46).

Morena o laetše Baisraele go tšea naga ya Baamore; ga ba a swanela go tšhoga, ka gobane O tla ba eta pele le go ba lwela. Kgonthišetšo ye ya Morena ka boYena, pego ye botse ya dihlodi mabapi le naga le go lebelela morago go ditiragalo tša go feta tša ka fao Modimo a ba abetšego ka gona leetong la bona lešokeng, di be di se tše lekanego gore ba obamele. Letšhogo la bona la batho le be le feta go hlompha ga bona Modimo. Poelo ya boitshwaro bjo? Moloko wo o tlogilego Egepeta o be o sa dumelelwa go tsena Kanana – ke fela bana le dihlodi tše pedi, Kalebe le Jonathane, bao ba tlago dumelelwa go tsena (Doiteronomio 1:35-39).

Ga ba e kwa taba ye, ba nyaka go obamela le semeetseng: “Moshe, re fošeditše Morena. Fela bjale re tla hlasela Baamore ka mo Morena Modimo wa rena a re laetšego” (Doiteronomio 1:41). Ka madimabe, sephetho se be se šetše se tšerwe – ba be ba sa dumelelwa go yo lwa, ka gobane O be a ka se be le bona gomme lenaba le be le tlo ba fenya. Gomme gape, ga se ba theeletša gomme ba šikara ditlamorago: “Ke ile ka le botša se Morena a se boletšego, eupša la se ke la ntheetša, la gana taelo ya Morena, mme ka boikgogomošo bja lena la šwahlela naga ya dithaba. Baamore ba ba bego ba dula moo dithabeng tšeo ba le gahlanetša bjalo ka motšhitšhi wa dinose. Ba le rakediša mme ba le fenya kua Horma, nageng ya dithaba ya Edomo. Ka gona ge le boa la llela Morena le nyaka thušo, fela yena a se ke a le theetša goba a le ela hloko” (Doiteronomio 1:43-45).

Bothata e be e le eng? Ge e le gabotse, ga se ba dumela gore ba dirile phošo le go nyaka go e lokiša! Wa bona, ba be ba nyaka go obamela ka dipeelo tša bona: ba dumetše go se obamele ga bona, eupša ba se kgopele tebalelo; ba nyaka go tšea sepheto ka bobona sa gore ke efe nako ya maleba ya gore ba obamele goba ba se obamele; ba nyakile go ya ntweng ka bobona. Ga se ba dumela tema ye e kgathago ke Modimo maphelong a bona, goba go mo hloka goba go dumela gore ke Yena a ba fihlišitšego bokgole bjo.

Bjalo ka Baisraele, thato ya rena, “Nna” goba “ka bonna”, ke tšhitišo e kgolo go obameleng. Jesu, morwa wa Modimo, o bontšhitše komabelo ye e nepagetšego: “A ikokobetša, a theeletša Modimo go iša lehung, lehung la sefapano” (Bafilipi 2:8). Mohlala wa gagwe ke ona o re swanetšego go o latela.