Ditswalano – Letšatši la 17

Mateu 15:21-28 e anega ka ketelo ya Jesu tikologong ye e bego e se ya Bajuda ya Tirose le Sidone moo mosadi wa Mokanana yo a bego a dula seleteng seo a mo goeletšego go fodiša morwedi wa gagwe yo a bego a tsene ke mademone. Lebaka la gore Bajuda ba be ba hloile batho ba gabo gomme barutiwa ba Jesu ba mo kgothaletša Jesu go mo raka, ga se la ka la mo tšhoša le ga tee – tumelo ya gagwe e be e le go Yena go Fodiša ngwana wa gagwe.

Le ge Jesu ka go se be le kgahlego A bolela gore O romilwe go dinku tše di lahlegilego tša Israele, ga se a gomela morago. A tla a itahlela maotong a Gagwe a re: “Morena, nthuše hle!” (Mateu 15:25). Lekga la bobedi Jesu o bolela go se nyake ga Gagwe: “Ga se gwa loka go tšea dijo tša bana wa di lahlela dimpša” (Mateu 15:26). Lega go le bjalo, o kwešišitše tlhalošo ya nnete ya se A se boletšego – a e ra gore ga a swanela ke go amogela tšhegofatšo ya Modimo. O ile a phegelela gomme a araba ka karabo ya go makatša ya tumelo: “Gona go bjalo, Morena. Fela le tšona dimpša di ja marathana ao a wago tafoleng ya beng ba tšona” (Mateu 15:27). Se ke se Jesu a bego a nyaka go se kwa. Go se be le kgahlego ga Gagwe go yena go tlišitše boipolelo bja tumelo ye e fenyago.

A lemoga gore a ka se hwetše lofo ya borotho ka moka go tšwa letsogong la Jesu, eupša marathana go tšwa letsogong la Gagwe e bile lofo ka moka ya borotho. Marathana a gagwe a tumelo e be e le mohuta wa tumelo ye Jesu a boletšego ka yona go Lukase 17:6: “Ge le ka be le na le tumelo ye nyenyane ya go lekana le thorwana ya mphogo, le be le ka botša sehlare se la re: ‘Tomoga, o yo ipšala ka kua lewatleng!’ Gomme se be se tla phetha taelo yeo.”

Tumelo ya gagwe e be e sa tutuetšwa ke go thibelwa, tshwaro e kgethegilego ya Bajuda, goba bokamorago bja gagwe bjalo ka moheitene. O tsebile gore go na le tše ntši go tšwa go Jesu le gore O tla di abela ka lethabo. Poelo ya kgopelo ya go se nolege moko, ya potego? Jesu a mo fetola a re: “ ‘Mmagobatho, tumelo ya gago ke ye kgolo! A go direge ka mo o kgopelago ka gona.’ Gomme ka yona nako yeo morwedi wa gagwe a fola” (Mateu 15:28).

Ge tumelo ya gago e lekwa ka dikwero, lenyatšo, maemo a boima, goba ka “aowa!”, ekaba o sa tlo mo tshepha? O tla tšwela pele go kgopela, le ge o tseba gore tše o di dirilego nakong ya go feta, le ga bjale di kgahlanong le wena? Ge o ka araba ka potego wa re “ee!”, o ka iketla go tsebo ya gore O tla tumiša marathana a gago a tumelo bjalo ka “tumelo e kgolo” le go araba kgopelo ya gago ka nako ya maleba gape ka tsela ya maleba.