Ditswalano – Letšatši la 19

Go obamela go kgoma pelo ya Morena; go thabiša Yena; Go fa Yena lethabo. “… monna (goba mosadi) yo a mo kgahlago, mme a mmea mmuši wa setšhaba sa gagwe” (1 Samuele 13:14) ke batho ba ba dirago thato ya Gagwe. Go abamela ga bana ba Gagwe go tla pela: “A ke eng seo se kgahlago Morena kudu: go phetha ditaelo tša gagwe, goba go mo direla dihlabelo tša go tšhungwa ka moka le dihlabelo tše dingwe?” (1 Samuele 15:22).

Kgoši Saulo o paletše ke go obamela melao ya Modimo. Go Samuele 13, Bafilista ba ikemešeditše ntwa, eupša Saulo o be a letile moprofeta Samuele, mmoleledi wa Modimo, go mo fa ditaelo tša gagwe le go kgopela thušo ya Modimo ka go dira dihlabelo tša go tšhungwa ka moka le tša kagišano (1 Samuele 10:8). Ge Saulo a bona madira a a bego a itlhamile o šoro ka dibetša, madira a a bego a tšhogile a Baheberu ao a bego a mo tlogela le Samuele, yo a bego a se a tšwe a etla, a se obamele: “Ka gona ka beta pelo ka dira sehlabelo” (1 Samuele 13:12). Letšhogo la batho, maemo le nako e feta, tša dira gore a se botege. A tšea tsela ya ka pejana.

Phošo e kgolo! Samuele a fihla. Go leta gantši ke teko ya tumelo ya motho le semelo – tumelo ye e sa tekatekego ya gore Yo a neago ditaelo, o tla di phethagatša le gore o swanetše go “ipeela” ka thoko. Saulo o paletše ke teko gomme a swanela ke go šikara ditlamorago: o ile a tšeelwa bogoši – le ge se se diregile morago bophelong bja gagwe. Ge e le gabotse, “Ka gobane wena ga se wa dira se Morena a go laetšego sona, yena o tla inyakela monna yo a mo kgahlago, mme a mmea mmuši wa setšhaba sa gagwe”, motho yo a obamelago (1 Samuele 13:14).

Taelo ya bobedi ya Saulo go tšwa go Morena e be e le go fediša Baamaleke, le tšohle tše ba bego ba na le tšona. Gape, Saulo ga a obamele ka mo go nepagetšego – ga se a bolaya kgoši ya Baamaleke, le dihuswane le dikgomo le dikgapana le diphookwana tše di nonnego ba se ke ba di bolaya. Phetolo ya Modimo go se: “Ke a itshola ge ke ile ka dira Saulo kgoši; o ntlhanametše gomme o nyaditše ditaelo tša ka” (1 Samuele 15:11). Saulo o be a tseba bokaone, goba o be a nagana bjalo.

Saulo a dira bjalo ka ge a tlwaetše. A se ipone phošo gomme a sola banna ba gagwe – e be e le tumo ya bona go tlišetša Morena dihlabelo. Thato ya gagwe le go tšhaba batho gape go bakile gore a se obamele Morena (1 Samuele15:24). Samuele o fapantšhitše go se obamele ga Saulo le go se dumele go ipona molato, borabele le boikgogomošo bjalo ka: “Go mo tsogela maatla ke mo gobe bjalo ka boloi, gomme go ikgogomoša ke sebe go swana le go rapela medimo e šele” (1 Samuele 15:23).

Wena le nna ga re a swanela go dumela gore letšhogo la rena la batho, boithaopo, boikgogomošo le borabele di re thibele go dira ka nepo se Morena a se bolelago. Ge Lentšu le Moya wo Mokgethwa di šogana le mokgwa wa tsela ya gago ya go phela, re swanetše go obamela ka gobane O na le motsotso o mongwe le o mongwe wa nako ya rena ya lehono le gosasa kgopolong ya Gagwe ge A re nea ditaelo. Go se obamele ga rena ka lebaka la boikgogomošo bja rena bo re iša fela go tsela ye e lego kgole le Yena.