Ditswalano – Letšatši la 12

Taba ye botse ka mehla e a amogelwa, eupša kudu ge e fenya lepheko la taba e mpe ye e tsebagatšago fela kholofologo le lehu.

2 Dikgoši 6:24 – 2 Dikgoši e anega mabapi le tlala ye e bego e le pheletšo ye e bego e ka se thibelwe ya badudi ba Samaria morago ga ge Basiria ba dikaneditše motse. Dijo le meetse di be di ka se oketšwe go tšwa ka ntle gomme dijo tše di bego di le gona di be di tura kudu.

Lega go le bjalo, karolo ye gape e anega ka fao batho ba go fapanafapana ba arabelago ka gona go mathata le ka fao bao o bego o sa ba letela, ba tšwelelago le goba bagale ba tlalelo.

Kgoši ya Samaria e be e nologile moko gomme e sa kgolwe gore ba ka phološwa; o be a nyaka go bolaya moprofeta Elisha gomme a sola Modimo ka mathata a bona. Mohlankedi wa gagwe le yena o be a hloka kholofelo bjalo ka yena – a fetola ka lenyatšo molaetša wa kholofelo wa gore ba tlo phološwa.

Moprofeta Elisha, ka letsogong le lengwe, o be a tshepha Modimo le go fihliša kholofetšo ya Gagwe go kgoši le mohlankedi wa gagwe wa gore go ka letšatši le le latelago go tla ba le dijo tše ntši motseng. Mohlankedi wa kgoši o nyatša ditaba tšeo.

Ba sa tsebe ditaba tše ka gare ga motse, banna ba bane ba go ba le bolwetši bja letlalo – balahlwa– ka ntle ga motse ba tšea sepheto sa go dira se sengwe ka pheletšo ya bona go e na le go dula ba leta. Ka maswiswana, ba tšea sepheto sa go yo ineela go madira a Siria le go amogela se se tlago direga go bona: “Ga go thuše selo go tsena motseng ka gobane ka moo re ya go hwa ka tlala; eupša ge re ka dula mo, le gona re tla hwa. Ka gona a re yeng mešašeng ya Basiria; ge eba ba ka re lesa re phela, re tla phela; ge eba ba ka re bolaya, re tla ikhwela” (2 Dikgoši 7:4). Ga se ba ke ba kgole mahlatse a bona – madira a tšhabile gomme ba tlogela mešaša! Go be go na le dijo tše ntši gomme ba tsene ka mešašeng ba ja, ba nwa le go tšea se sengwe le se sengwe seo ba bego ba se nyaka, go fihla ge letswalo la bona le ba ahlola: “Se re se dirago ga sa loka! Re na le taba tše botse eupša re ikhomoletše! Ge re ka leta go fihlela ge letšatši le hlaba, ruri re tla otlwa. A re yeng gonabjale re yo bega taba tše mošate!” (2 Dikgoši 7:9).

Ba bile bagale ba kanegelo! Ba be ba le barwadi ba taba ye botse, molaetša wa phološo: Modimo ke Moabedi yo botse le Mohlabani yo a fenyago wa ntwa!

Wena le nna re na le kgetho ya ka fao re šoganago le mathata. Mokgwa wa tlhago ke go lebelela yo re ka go mo rweša molato, go sola Modimo, le go nagana le go bolela gampe. Ka dinako tše dingwe, dipelo le dithapelo tša rena di swanetše go “ineela” go lehlakore la kholofelo go re gopotša ka seo Modimo a kgonago go se dira. Gomme re gome re iše taba ye botse go rena le go ba bangwe: Modimo o a kgona! O šetše a kgonne! Ke Mongwadi wa taba ye botse!