Dithuto tša bophelo go tšwa Bibeleng – letšatši la 3

Go lebelela maphelo a batho ba bangwe bao ba sa tsebegego kudu ka Bibeleng ke selo sa go thabiša. Ba bangwe ke mehlala e mebotse go fihla lehono. Ba bangwe ke mehlala e phethagetšego ya seo re swanetšego go se thibela. Gomme go na le bao maphelo a bona a utollago ka fao Modimo a šomago ka gona ka dipheto tša bona tša go šireletša batho ba gagwe. Motho o bjalo go be go le Bashti.

Bashti o be a nyetšwe ke Zerksese (Ahasurase) yo a bego a buša go tloga India go ya Etopia. Ka ngwaga wa boraro wa pušo ya gagwe, o ile a laletša bakgomana le bahlanka ba gagwe go tšwa mmušong wa gagwe ka moka, gaešita le baetapele ba sešole ba Persia le Media, monyanyanyeng o bego o swaretšwe ntlong ya gagwe ya bogoši. Matšatši a 180 ka moka, o ile a nea baeng ba gagwe beine le dijo ge a ba bontšha bogolo bja mahumo a gagwe le botse bja mmušo ya gagwe.

Morago ga moo, o ile a mema batho ka moka ba Susa (motsemošate wa gagwe) go tlatša baeng ba gagwe go monyanya wa matšatši a šupa o swaretšwe ka serapeng. Go swanetše go ba go bile monyanya o mogolo go feta menyanya ka moka e swarelwago ka serapeng. Kgoro ya mošate e be e kgabišitšwe gape e na le ditulo tša gauta le silibera. Beine e be e tlišwa ka dinwelo tša go ikgetha tša gauta gomme yo mongwe le yo mongwe o be a e nwa ka mo a ratago (Estere 1:7-8).

Ka letšatši la bošupa, kgoši yo a bego a ikhoretše dino a laela gore Bashti a tlišwe pele ga gagwe le baeng ba gagwe bao ba bego ba tagilwe. O be a nyaka go ba kgantšhetša ka moka botse bja gagwe.

Bashti a gana nnang. Kgoši o ile a befela kudu. O ile a tuka bogale ka lenyatšo le a mo filego lona. A kgopela keletšo go baeletši gomme ba dumelelana gore maitshwaro a Bashti ke ao a sa lebalelwego. Kgoši ya tloša Bashti bjalo ka Mohumagadi le go mo raka mošate wa gagwe.
Boitshwaro bja Bashti bja go gana bo bile le ditlamorago tše kgolo. Estere, Mojuda, e ba mohumagadi gomme Mordekai, malome wa gagwe, tonakgolo. O ile a folotšiša leano la gore Bajuda ka moka ba fedišwe. Go e na le moo, kgoši a nea Bajuda tokelo ya go itšhireletša kgahlanong le manaba a bona. Se ba se dirile gomme morafe wa Bajuda wa bolokega. Mengwaga e 500 ka morago, kholofetšo ya Modimo, ya gore ka peu ya Abrahama batho ka moka lefaseng ba tla šegofatšwa (Genese 12:2-3), ya phethagatšwa ka matswalo a Mesia kua Bethlehema. Leano la Modimo, la gore batho ka moka ba tla šegofatšwa ka Jesu Kriste, la atlega.