Dira phapano – Letšatši la 5

Thabelang seo, le ge e le gore gabjale le tlemegile go nyama ka lebaka la meleko ya mehutahuta ye e le tlelago. Meleko yeo e le tlela gore Modimo a bone ge eba tumelo ya lena ke ya nnete. Ešita le gauta, yona e kgonago go senyega, e lekwa ka mollo; bjale ge, le tumelo ya lena, yona e lego bohlokwa kudu go feta gauta, e swanetše go lekwa. Ge e le ya nnete le tla retwa, la tumišwa, la ba la hlompšha mohla Jesu Kriste a etla. 1 Petrose 1:6-7

Tlaišego e tla ka ditsela tše ntši, eupša naa o lemogile gore go Mokriste, ke boitemogelo bjo bobotse?

Manyami a ka re tlela ge motho yo re mo ratago a hlokofala goba ngwana a ile nageng ye nngwe; eupša ge lenyalo la rena le hlaselwa goba re letile tefo, a ka re kweša bohloko ka tsela e fapanego. Ge e ba o kotsing ya go lahlegelwa ke mošomo wa gago ka gobane o boletše ka tumelo ya gago goba o letile pula, goba o tseleng ya sedukaduka, Jakobose o re, “Banabešo, le itsheme ba lehlogonolo kudu ge le tlelwa ke meleko ya mehutahuta, gobane le a tseba gore go lekwa tumelo ga lena go le tlišetša kgotlelelo.” (Jakobose 1:2-3)

Meleko ga e thabiše, eupša e dira gore re gole. Sekolong, meloko e gona ka lebaka. Gantši ga re ipshine ka yona ka gobane re boifa gore e ka ama menyetla ya rena ya go ba karolo ya sehlopha goba go ya yunibesithing ye e itšego; eupša go sa šetše ditlamorago, meleko ye e aga semelo, le go godiša bohlale le kgotlelelo ka gare go rena.

Re a tlaišega ka lebaka la meleko ye bjalo ka Bakriste ka gobane re na le selo se bohlokwahlokwa kudu go feta gauta. Tumelo ya rena ke ye botse kudu gomme meleko ke tsela ya Modimo ya go netefatša gore ke ya kgonthe. Ge re fiwa dijo tša plastiki go re re je, tšhelete ya bofora go reka diaparo, goba tshedimošo ya bofora mabapi le se se diregago ka malapeng a rena goba nageng, naa se se ka re thuša? Aowa. Re a kwešiša gore ga go na mohola le gore go ka se re thuše ka selo. Go no ba bjalo ka tumelo ya rena: e ka se re thuše ge e se ya nnete.

Re ka thabela kgegeo ya go tlaišega go matlafatša tumelo ya rena, ka gobane Jesu o re nea bophelo bjo bo feletšego gomme ka boitemogelo bjo bongwe le bjo bongwe, re hwetša lethabo le legolo – gaešita le bohloko. Petrose o re netefaletša gore tlaišego ye e a re thuša le go tumiša Modimo.

Go a makatša ka fao Modimo a re tsebago bokgauswi ka gona le ka fao e lego yo botho go rena! Ge re kgotleletše le yena ka gare ga moleko, a ka fetoša mathata a rena le go tlatša dipelo tša rena ka lethabo le semeetseng. Re a kgothatšwa manyaming a rena; manyalo a rena a tsošološwa le go matlafatšwa, sedukaduka se fetoša boyo, gomme pula ya na. O fetoša kwešišo ya rena gomme re a mo tumiša ka ge a re kgontšhitše. Paulose o tiišetša gore, “Gape re tseba ge go ba ba ratago Modimo dilo ka moka di šomela go ba hola, bona bao a ba biditšego go ya ka mo a bego a ikemišeditše ka gona.” (Baroma 8:28)

Ake Modimo a go šegofatše ka maitemogelo a mantši a se bophelong bja gago!