Dira phapano – Letšatši la 4

… bohwa bjo le lena Modimo a le beetšego bjona legodimong. Ke bjo bo sa bolego, bjo bo se nago bosodi, le gona bo sa hwelelego. Ke bja lena bao ka maatla a Modimo le lotwago ka tumelo, gore le tle le fihlele phološo ye e tlilogo utollwa mafelelong a nako. 1 Petrose 1:4-5

Nakong e fetilego, re boletše ka kholofelo le ka fao ka dinako tše dingwe e tšwelelago bjalo ka selo se nnoši seo batho ba šetšego ka sona seo ba swarelelago go sona maphelong a bona, nakong yeo go bonalago o ka re dilo ka moka di lahlegile. Bafaladi go ralala le lefase ba nyaka lefelo la go dula ka ntle ga dinaga tša gabobona, ka kholofelo ya go hwetša tšhireletšo ya bona le malapa a bona. Go oketša go kholofelo gantši ke selo se sengwe: tumelo. Lehono re lebelela ka fao kholofelo le tumelo di kgokaganago.

Baheberu 11:1,6 e re: “Tumelo ke bonnete bja tše re holofelago gore di tla hlaga, ke go kgolwa tše re sa di bonego. Gape ge motho a se na tumelo a ka se kgahle Modimo, gobane yo a tlago go Modimo o swanetše go ba le tumelo ya go re Modimo o gona, le go re o putsa ba ba mo nyakago.”

Ka nnete go bile tumelo, ye e oketšwago go kholofelo ya go phološa bana ba gagwe yeo e kgontšhitšego mme wa sebete, le bana ba gagwe ba bannyane, go sepela dikilometara tše dikete go tloga Rwanda go ya Afrika Borwa. Ke Modimo fela yo a ba kgontšhitšego go tšhabela masetlapelo a ntwa le dikgaruru nageng ya gabobona, le go fihla ba bolokegile boyong bja bona. O dirile seo gomme o fetošitše maphelo a bona!

Batho bao ba dirago ka tumelo ba dira phapano ka ge ba kgona go “bona” seswantšho se segolo kgole go feta ditekanyetšo tša maphelo a bona. Ba holofela go yo mongwe yo mogolo kudu go feta bona. Ge tumelo ya rena le kholofelo di le go yena, maatla a Modimo a re šireletša le go tšwela pele go dira bjalo go fihlela Jesu a boa gomme phološo e feletše. Eupša, tumelo ya rena e swanetše go šoma. Ke maketše kudu go hwetša gore Moshe o itshwere ka tumelo ya gagwe bjale ka ge gantši re dira ka ya rena.

Moshe o ntšhitše Baisraele Egepeta ka tumelo. O be a tseba Modimo gomme a nyaka go mo obamela. Eupša ge ba sepetše madira a Egepeta a ile a ba rakediša, Baisraele ba be ba tšhogile ge ba bona ba ba rakediša (le rena re be re tla tšhoga) gomme ba llela go Modimo go ba phološa. “Morena a re go Moshe: ‘Le reng le lla le nyaka thušo? Laela setšhaba se rutlologele pele. Wena o emiše lepara la gago, o le lobalatše ka godimo ga lewatle … mme Baisraele ba tla tshela lewatle mo go omilego.’ ” (Eksodose 14:15-16)

Modimo o bile le leano le le phethagetšego la polokego ya bona, eupša Moshe le Baisraele ba be ba ipalediša ka go mela medu fase ka poifo, go e na le go ya pele. Ge ba obamela gomme ba sepela go ya pele ka tumelo, ba ile ba phološwa.

Naa le rena re palediša leano la Modimo ka go boifa go dira se a re boditšego gore re se dire? Ge re nyaka go dira phapano, go bohlokwa go rena go diriša tumelo ya rena le go gola.