Dira phapano – Letšatši la 14

Bjale ka gobane le itlhwekišitše ka go latela therešo gore le rate badumedikalena ka lerato la mmakgonthe, le rataneng e le ruri ka dipelo tša lena ka moka. 1 Petrose 1:22

“Le rataneng e le ruri ka dipelo tša lena ka moka” ke taelo ya molatedi yo mongwe le yo mongwe wa nnete wa Jesu, go sa šetšwe mengwaga ya rena le moo re dulago gona. Kae le kae moo re lego gona, ka mehla go tlo ba le maemo ao a re lekago tabeng ye ya go rata ka pelo ka moka bjalo ka ge Jesu a dirile, gomme le ge diteko tša rena tše kgolo ka dinako tše dingwe di tšwa go batho ba re lego kgauswi le bona, se se diregago pitšong ya rena le sona se ka leka potego ya tumelo ya rena.

Ka mehla ke hlompha baromiwa bao ba yago mafelong ao a sa tsebjego, go yo bega ebangedi go batho bao ba sa kago ba kwa lentšu “Jesu” gomme ga se ba tseba lethabo la go ba le lentšu le le phelago, Bibele. Baromiwa ba lekiwa tumelo ya bona makga a mantši, maemong a boima a go phela kgole le gae le go ineela tše kaonekaone go Jesu, mola ba itlwaetša ditšo tša go fapafapana le diklimate.

Jim le Elisabeth Elliot pele ba kopane kholetšha kua Amerika gomme ba hlankela bjalo ka baromiwa dikarolong tše fapanego tša Ecuador mengwaga ye mehlano pele ba beeletšana, gomme ka morago ba nyalana fao. Mošomo wa bona e bile go tliša ebangedi go meloko ye sehlogo ya Auca, le ge go le bjalo, ka maiteko ya go ruta batho bao ba sa fihlelelwago ebangedi, Jim le baromiwa ba bangwe ba bane ba ile ba bolawa, ka lebaka la go se kwešišane, ke batho bao ba bego ba leka go ba fihlelela, a tlogela Elisabeth le ngwana wa bona wa dikgwedi tše 10, gammogo le basadi ba baromiwa ba bangwe.

Elisabeth le basadi ba bangwe ba bontšhitše potego ya bona ya lerato la bona gomme ba obamela mantšu a Jesu, “le rate manaba a lena, le rapelele bao ba le hlomerego” (Mateu 5:44). Ka go tšea sephetho sa go dula le go šoma le meloko ye e bolailego banna ba bona, gomme ka morago ga go ba hlankela mengwaga ye mmalwa, ba ile ba dira gore batho ba ba bolailego banna ba bona ba latele Kriste. Seo e bile tiro ye e makatšago ya kgaugelo!

Go Corrie Ten Boom, “go obamela nnete” go “ba le lerato la nnete” go mo dumeletše go lebalela moleti kua Ravensbruck, kampa ya tshwenyo, moo yena le sesi wa gagwe ba bego ba golegilwe, go mo lokolotše go “rata (yena) ka pelo ka moka.”

Se ga se selo sa tlhago; ke bohlatse bja bomodimo. Se direga ge fela re le ba Modimo, re lebaletšwe ke yena le go lokollwa gore re lebalele ba bangwe le go ba rata ka pelo ka moka.