Dikholofetšo tše botse tša Modimo – Letšatši la 6
Mesia yo a holofeditšwego o tlišitše tshepedišo ye mpsha ya bodumedi
(Di)temana ya Bibele
BAHEBERU 9
Tirelo ye kgolo ya tempeleng kua Jerusalema e be e direga gatee ka ngwaga ka Letšatši la Poelano (Yom Kippur). Ke fela ka lona letšatši leo moo Moprista yo Mogolo a dumeletšwego go tsena ka phapošing ya ka gare ya tempele. E be e le Felo mo Gokgethwakgethwa. Moo o tla direla Modimo sehlabelo sa madi gore dibe tša batho di lebalelwe: “Bophelo bja sephedi se sengwe le se sengwe bo mading, gomme ke ka lebaka leo Morena a laetšego gore madi a tšhollelwe aletareng go boelanya batho le Morena. Madi ke bophelo, gomme a boelanya batho le Morena” (Lefitikose 17:11).
Mateu o ngwetše gore ge Morena wa rena Jesu Kriste a hlokafala, seširo sa tempele sa gagoga ka bogare go tloga godimo go fihla fase (Mateu 27:51).
Go be go sena tlhoko ya gore Moprista yo Mogolo a dire sehlabelo sa madi ngwaga le ngwaga gore dibe di lebalelwe. Jesu o tšholotše madi a gagwe go tliša tebalelo le phološo go bohle bao ba mo amogetšego bjalo ka Mophološi. Go ya pele bana ka moka ba Modimo ba tla kgona go ya go Modimo ka Morena Jesu Kriste. Ke yena Moprista yo Mogolo wa rena, yo ga bjale a re rapelelago legatong la rena kua legodimong.
Lehono lefelong le go bego go le tempele ya Solomone le tempele ya bobedi, ye Heroda a e mpshafaditšego kudu, go agilwe lefelo la borapedi la Islam. Tempele ye e dirilwego ke motho kua Jerusalema ga e bohlokwa go tumelo ya rena. Gobane ka mogau wa Modimo, rena ka noši re tempele ya Modimo gomme Moya wa Modimo o phela ka gare ga rena (1 Bakorinte 3:16). Ga go retwe Morena!
