Dikholofetšo tše botse tša Modimo – Letšatši la 5

Dilo di a direga maphelong a rena tšeo di ka se kwešišegego gomme di ka baka bothata tumelong ya rena.

Ke ka nako yeo moo re gopolago mantšu a Jesaya: “Megopolo ya ka ga e swane le ya lena, le ditsela tša ka di fapana le tša lena” (Jesaya 55:8).

Ga re gopole bjalo ka Modimo le Modimo ga a hlaloše taelo ye nngwe le ye nngwe go rena, eupša go tloga go Genese go ya go Kutollo kholofetšo ye nngwe le ye nngwe ye a e dirago go rena e sepedišana le taelo.

Go temana ya rena ya lehono kholofetšo ye kgethwa e fiwa ka moprofeta Sakaria. O profeta go tloga ka 520 go ya go 518 BC ge Bajuda ba bantši ba boela Jerusalema go yo aga motse le tempele. Ka ntle le diprofeto tša gagwe ga go tše ntši tše re di tsebago ka yena. Jesu o re botša gore o bolailwe ka tempeleng (Mateu 23:35).

Ga re tsebe gore ba boile neng, bathopša ba thoma go goga maoto go aga tempele (Hagai 1). Sakaria o ba lemošitše gore ba bee Modimo pele le go botega go yena. Ke keletšo ye le rena re swanetšego go e latela gobane e na le kholofetšo ye botse ka gare go yona ya kgonthišetšo ya go tšwa go Modimo: “Boelang go nna le nna ke tla boela go lena.”

Go na le Bakriste ba, ge dilo tše mpe di direga go bona goba go bao ba ba ratago, ba ikwa ba nyamišitšwe ke Modimo gomme ba mo lahla. Ba bangwe ba iketla kudu tumelong ya bona le go lahlegelwa ke phišego ye ba bego ba na le yona. Bakriste ba bangwe ba bile batšwasehlabelo go teko, ba a tseba gore ba sentše kudu gomme ba dumela gore Modimo a ka se tsoge a ba lebaletše.

Ke nnete gore Modimo o tlo ahlola yo mongwe le yo mongwe wa rena letšatši le lengwe eupša nako yeo ga se bjale. Go sa šetšwe boemo bja gago bja semoya – ga go motho lefaseng yo a lego ka godimo ga kgaugelo ya Modimo. Go sa na le nako ya gore o boele go yena. Ge re dira bjalo ka boitsholo bja kgonthe, re na le kholofetšo ya gagwe ya gore o tlo boela go rena. Re hlankela Modimo wa lerato le mogau.