Dikholofetšo tše botse tša Modimo – Letšatši la 19

Go itshola ka nnete ge o dirile phošo le go kgopela go lebalelwa go nyaka sebete, go tšea kgato le go lebalela motho yo a go diretšego phošo go boima kudu.

Moapostola Petrose o nyakile keletšo ya Morena go tebalelo: “Morena, na ge ngwanešo a ka no fela a mphošetša, ke mo lebalele gakae? Ke mo lebalele gašupa?” Jesu a fetola: “Nna ga ke re gašupa, eupša ke re ga masome a a šupago a balwa gašupa” (Mateu 18:21-22).

Potšišo ya Petrose ke ye batho gantši ba lwešanago le yona. Bibele ga e kwanantšhe ka bohlokwa bja go ba le tswalano ya maleba bobedi le Modimo le batho ba bangwe.

Temana ya rena e na le kholofetšo: “Tatagolena wa legodimong le yena o tla le lebalela.” Go sa šetšwe gore motho o dirile sebe se segolo bjang, Modimo o a fišegela gomme o ikemišeditše go lebalela.

Lengwalo la pele la Johanese le re: “Eupša ge re ipolela dibe tša rena, ka ge Modimo a phetha tše a re holofetšago tšona mme a dira tše di lokilego, o re swarela tšona, a re hlatswa bokgopo bjohle” (1 Johanese 1:9).

Kgato ya pele ye re hlokago go e tšea ge re phošeditše ba bangwe, ke go rapela go Modimo re kgopela tebalelo. Morena wa rena Jesu o re rutile gore re ka dira seo bjang: “O re lebalele melato ya rena bjalo ka ge le rena re lebalela ba ba nago le melato go rena” (Mateu 6:12). Gomme re hloka go ya go motho yo re mo phošeditšego gomme re leke go lokiša tswalano.

Taelo ye e sepedišanago le kholofetšo ya lehono, e direga ge motho yo mongwe a go phošeditše. Ga go bonolo go lebalela eupša ga go selo se se gobatšago motho go e na le go swara dikgopi le lehloyo.

Go lebalela, eupša go se lebale ga se kgetho ka gore seo ga se tebalelo. Re swanetše go lebalela ba bangwe ka mo go feletšego pele re ka lebalelwa.

Go ithuta go ka lebalela ka nnete ga re hloke go lebelela go feta Morena wa rena Jesu Kriste. A lekeletše sefapanong ka bohloko bjo bogolo ka lebaka la dibe tša gago le tša ka, a rapela: “Tate, ba lebalele, gobane ga ba tsebe se ba se dirago!” (Lukase 23:34).

Modimo o re lebaletše dibe gomme o re bitša go dira ka mo go swanago.