Dikholofetšo tše botse tša Modimo – Letšatši la 18

Ka moka re babjadi ka tsela e itšego. Letšatši le letšatši, ka mantšu a rena le ditiro, re bjala dipeu tša boloki goba bobe. Dipeu tše di tlišago dimyemyelo le lethabo goba dipeu tše di bakago dikeledi le go felelwa ke kholofelo. Mantšu a rena le ditiro di huetša ba bangwe go tše botse goba go pheletšo ya bona.

Seswantšho sa pele se Jesu a boditšego barutiwa ba gagwe, go ya ka Mateu, ke seswantšho sa molemi yo a tšwilego go yo bjala dipeu. Dipeu tše dingwe tše a di gašitšego tša wela tseleng, tše dingwe tša wela lekgwareng, tše dingwe tša wela mehlašaneng, tše dingwe mobung o nonnego. Ke fela peu ye e wetšego mobung o nonnego ye e metšego (Mateu 13:3-8).

Barutiwa ba gagwe ba mmotšiša gore ke ka lebaka la eng a be a bolela le lešaba ka diswantšho. Jesu a hlaloša gore diphiri tša Mmušo wa Modimo di utolletšwe barutiwa, eupša go bao ba bego ba sa gaugelwa, o bolela ka diswantšho.

Gomme Jesu a hlaloša tlhalošo ya seswantšho sa mobjadi (Mateu 13:18-23). A bapetša dipeu tše di bjetšwego ke molemi go lentšu la Modimo (Lukase 8:11).

Bjalo ka modiri-mmgo le Kriste, Mokriste yo mongwe le yo mongwe ke mobjadi. Ka mantšu le ditiro tša rena, re swanetše go bjala lentšu la Modimo. Ka dinako tše dingwe re tlo nyama kudu ka gobane ga se dipeu ka moka tše re di bjalago tše di tlago wela ditsebeng tša maleba. Re ka letela go ganwa le go se amogelwe eupša re swanetše go kgotlelela.

Re ka no se bone poelo ya go bjala ga rena nakong ya rena lefaseng, eupša letšatši le lengwe re tla e bona.

Paulose o ngwetše go 1 Bakorinte 3:6: “Nna ke bjetše peu, Apolose a e nošetša; eupša wa go e mediša e bile Modimo.” Paulose le Apolose ba phethile morero wa bona. Bjale ke nako ya rena go swarana ka matsogo gomme re bjale tšehemo ya Modimo.

A re yeng pele ka tumelo. Go na le mošomo wo re swanetšego go o dira.