Dikholofetšo tše botse tša Modimo – Letšatši la 14

Ka moka ga rena re batho ba ba nago le DNA ya moswananoši. Ditšo tša rena, maleme le maemo a rena a go phela a fapane kudu, eupša re na le phišego ye e swanago – go hlologela lerato. Ka madimabe go na le bao, ka letšhogo la go kwešwa bohloko le go lahlwa, ka dinako tše dingwe ba ka tswalela menagano ya bona go lerato le go leka go phela bophelo bja go hloka lerato. Ba swanetše go kwelwa bohloko kudu.

Lentšu la Modimo le hlaloša gabotse gore ge re sena lerato, ga re na selo gomme re ka se ye felo (1 Bakorinte 13:1-3).

Ka madimabe, lentšu lerato le šomišwa gantši go leleme le lengwe le le lengwe mo le akaretšago ditlhalošo tše ntši go tloga go dilo tša motheo go ya go tša Modimo.

Temana ya rena ya lehono e holofetša gore lerato ke tlhago ya Modimo. Modimo ke lerato. Lerato la Modimo ke motheo mo tswalano ye nngwe le ye nngwe ye e phethagetšego kua legodimong goba lefaseng e theilwego go wona. Ke selo sa tlhago se se kopanyago Modimo, barongwa ba bagolo le bohle ka moka legodimong le babotegi ba Modimo mo lefaseng.

Lerato la Bakriste ke la bohle. Le buletšwe bohle ba ba dumelago gore Jesu ke Morwa wa Modimo. Seo ke senyakwa.

Jesu o hlatseditše go lerato le tatagwe a bego a na le lona go yena le go kgontšha balatedi ba gagwe go ka ba karolo ya lerato leo (Johanese 17:26).

Re na le kholofetšo ye kgethwa ya gore Modimo o phela ka gare go rena le gore Moya wo Mokgethwa o re thuša go phethagatša melao ye mebedi ye megolo: “ ‘O rate Morena Modimo wa gago ka pelo ya gago ka moka, le ka moya wa gago ka moka, le ka maatla a gago ka moka, le ka tlhaologanyo ya gago ka moka,’ le ‘bangwekawena o ba rate bjalo ka ge o ithata’ ” (Lukase 10:27).

Melao ye go be go tlo ba boima go e obamela ge go be go se na Moya wo Mokgethwa wo o phethagatšago tumelo ya rena.