Dikenywa tša Moya – Letšatši la 20

Dikenywa tša Moya tšona ke lerato, le lethabo, le khutšo, le bopelotelele, le botho, le go loka, le potego, le boleta, le boitshwaro. Bagalata 5:22-23a

Na ga se gore o nyatša Modimo ka ge a lokile kudu, a sa go felele pelo, a le pelotelele? Ga ke re o a tseba gore Modimo, ka botho bja gagwe, o rata go go hlahla gore o sokologe? Baroma 2:4

Botho le go loka go boima go di hwetša setšhabeng. Gantši, batho ba lokile, eupša botho ga bo swane le go loka; motho a ka ba yo botho eupša a se loke. Ge o lebelela “go loka” ka pukuntšung, o tla bona mantšu bjalo ka go thabiša, go ipshina goba botse. Ka mo go fapanego, botho ke go dira selo se sebotse le go se letele go hwetša se sengwe morago. Botho ke tlhompho le go thuša ba bangwe ka ntle le go letela yo mongwe go go direla se sengwe.

Re swanetše go bontšha botho go batho ba bangwe, ka gobane ke botho bjo Modimo a re bontšhitšego bjona. Ka botho, o re swara ka letsogo le go re hlahla go ya go bophelo bjo bo fetogilego kudu. Baroma e re botša gore botho bja Modimo bo swanetše go dira gore re fetoge. Modimo o re bontšha botho ge re sa dira selo gore bo re swanele. Re ka se itokafatše pele ga Modimo yo mokgethwa, e se ka polelo ya rena, ka tiragatšo ya rena goba sehlabelo sa rena. Ge re kopana le kgaugelo ya Modimo ye e makatšago le go lemoga ka mo go feletšego gore re baamogedi ba mogau wo o sa re swanelago, re a kokobetšwa. Go oketša moo, ge re kwešiša gabotse Modimo yo a dirilego lefase gore o re nea mpho ye nngwe le ye nngwe e botse, re leka go phela bophelo bja go mo thabiša le go leka go bontšha botho bja gagwe go ba bangwe.