Dikenywa tša Moya – Letšatši la 19

Dikenywa tša Moya tšona ke lerato, le lethabo, le khutšo, le bopelotelele, le botho, le go loka, le potego, le boleta, le boitshwaro. Bagalata 5:22-23a

Banabešo, le itsheme ba lehlogonolo kudu ge le tlelwa ke meleko ya mehutahuta, gobane le a tseba gore go lekwa tumelo ga lena go le tlišetša kgotlelelo. Tšwelang pele le kgotlelele, ke mo le tlago ba ba ba feletšego, ba ba se nago bosodi le ba ba sa hlokego selo. Jakobose 1:2-4

Diphetolelo tše dingwe tša Bibele di šomiša lentšu kgotlelelo go karolo ye ya dikenywa tša Moya, eupša bopelotelele ke go feta seka sa go leta goba go kgotlelela selo. Se Paulose le Jakobose ba bolelago ka sona ke bopelotelele, go ema o tia, bokgoni bja go kgotlelela tlhomaro le tshwaro ye mpe ka sebete sa kholofelo se se lwantšhago go lapa le phenyo. Bopelotelele bo hlaloša motho yo a nago le maatla go ka itefeletša, eupša go e na le moo, a itshwara.

Re swaragana le batho letšatši le letšatši – ka sebele, ka founu, ka emeile, inthaneteng, bjalobjalo. Gantši, batho ba ba re kweša bohloko le go re gobatša ka ditiro le mantšu. Batho ba re roga le go re latofatša ka dilo tše re sa di dirago. Re ikhwetša re le ka gare ga dingangišano. Ge motho a bolela selo se ke ke sa se ratego goba go se dumelelane le sona, go bonolo go nna gore ke befele le go selikišega. Ke nyaka go omanya motho yoo, ke nyaka go fenya ngangišano le go tšea sephetho. Le ge go le bjalo, re hloka go ba le kgotlelelo dikamanong tša rena ka moka le ba bangwe. Ga re a swanela go ba le kgotlelelo go batho fela, eupša go maemo a thata a re swaraganago le wona. Re itemogela dilo bophelong tše re sa di kwešišego, re a befela, re a ngongorega le go ngunanguna. Eupša kgotlelelo ga se go ngunanguna, go ngongorega le go befela, ke selo se fapanego. Selo se o swanetšego go se “dira” ke go ngongorega. Bopelotelele ke go ba ka gare ga boemo bjo boima, bja go kweša bohloko ka ntle le go ngongorega.

Bjalo ka Bakriste, ga se mošomo wa rena go ikarabela le go ntšhetša pefelo ya rena go yo mongwe ge ba re kwešitše bohloko goba ba re phošeditše. Ke mošomo wa Modimo go lokiša dilo. Ke mošomo wa rena go lebalelana. Re hloka go nea Modimo boemo, kgobalo le bohloko.