Bea tumelo ya gago go yena – Letšatši la 7
Mahumo ka gare ga dipitša tša letsopa
(Di)temana ya Bibele
2 BAKORINTE 4
Eupša rena re swerego lehumo le re swana le dibjana tša letsopa, e le gona gore go bonagale gore maatla a magolo a go feta ohle ke a Modimo, ga se a rena. Re tlaišwa ka mekgwa yohle, fela ga re palelwe; re mo kgakanegong, fela ga re itlhoboge; re a hlomarwa, fela Modimo ga a re tlogele; re digelwa fase, fela ga re feleletšwe. Ka mehla re dula re le kotsing ya go bolawa ra etša Jesu, fela re sa phela, go laetša gore Jesu o a phela. 2 Bakorinte 4:7-10
Ge lengwalo le le ngwalwa, dipitša tša letsopa e be e le Tupperware ya lefase. Di be di rekega bonolo, di thubega bonolo gomme di dirišwa go swara dilo ka moka go tloga go meetse le dijo, go ya go tšhelete le dibjanyabe. Paulose o bapetša maphelo a rena le dipitša tša letsopa, a re ga re fela ditšhelo tša letsopa tše di tlwaelegilego, eupša re a pšhatlega le go phatloga. Le ge go le bjalo, le ge re thubega gabonolo, lehumo le re le swerego ke le lebotse kudu gomme ga le bapišwe le selo.
Modimo o bea lehumo le lebotse ka gare ga “dibjana tše tša letsopa” tše di thubegago gabonolo. Ka lebaka la eng? Gore ba bangwe ba tla bona le go itemogela lehumo la Kriste, go e na le go kgahlwa ke rena. Maphelo a rena ga a dirwa goba go maatlafatšwa ka khonkriti, tšhipi, goba silibera goba gauta gore re kgone go itheta ka katlego ya rena lefaseng le. Go e na le moo, a dirilwe ka letsopa le le tlwaelgilego, didirišwa tša letsopa, gore letago la Modimo maphelong a rena le bonagale gabonolo.
Go direga eng ge pitša ya letsopa e šikinyega, e thubega goba e phatloga? Diteng di a tšhologa. Gomme ge motho yo a thubegago gabonolo yo a tletšego ka Kriste a “gatelelwa”, a “gakanegile”, a “hlomarwa” goba a “bolawa”? Jesu, bophelo bja gagwe, lehu le tsogo o tla a tšhologa!
Go šikinyega le go bethwa maphelong a rena ga se ka lebaka la gore Modimo o re lahlile, ke ka gobane re barongwa bao ba tshephegago ba letago la gagwe. Modimo o dumelela tshepetšo ya go bethwa le go thubega go direga maphelong a rena, eupša seo ke karolo ya kgolo ya Mokriste. Go botse go ba pitša ya letsopa.
