Bea tumelo ya gago go yena – Letšatši la 6
Bontšha letago la Modimo, gannyane gannyane
(Di)temana ya Bibele
2 BAKORINTE 3
Ka gona, rena ka moka re bonagatša letago la Morena bjalo ka seipone re se ra ikhurumetša difahlego; gomme re a fetošwa ra swana naye le go feta pele ka letago. Seo se dirwa ke Morena, yo e lego yena Moya. 2 Bakorinte 3:18
Matšatši a, re tshwenyega kudu ka lebelo le go šoma gabotse; re nyaka go dira dilo ka potlako. Mekgwa ye le maitshwaro e ba gona maphelong a rena a semoya gape. Re nyaka thero, seminare goba boitemogelo bjo bo tlago rarolla mathata a rena le semeetseng, bo tloše teko ka moka le go re lokolla go bohloko bjo bo o ketšegago bja go gola go Kriste.
Modimo, le ge go le bjalo, o na le kgahlego e ntši go maatla le go tsepama go e na le lebelo.
Rena, bjalo ka Moshe ge a be a tsena ka tebanakeleng go bolela le Modimo, gape re tla bogoneng bja gagwe ka difahlego tše bulegilego (ke gore tše di se nago seširo) ge re bala lentšu la gagwe, leo bobedi le utollago bao re lego bona, bjalo ka seiponi, le go re utollela letago la Morena Jesu Kriste. Ka go dira bjalo, re thoma go bontšha seswantšho sa gagwe maphelong a rena. Letago le le bonwago go Kriste le hlola letago le swanago ka gare go rena.
Moya wo Mokgethwa o dira gore phetogo ye ya letago e kgonege. Go ba bjalo ka Kriste ke tebo ya rena ya mafelelo, eupša leeto la rena ke la bophelo ka moka. Letšatši le letšatši Modimo o nyaka gore gannyane gannyane re be bjalo ka yena.
Ka nnete, dilo tše bonolo kudu gantši di boima go di dira. Ge o sa le wa leka go ba le sebopego se sebotse sa mmele, o tla tseba gore go ja gabotse le go itšhidulla gantši ke tsela e nnoši ya go dira seo. Ga gona dijo tša maleatlana, go itšhidulla ga mohlolo le dipilisi tša mohlolo. O swanetše go itšhidulla le go ja gabotse, letšatši le letšatši.
Go bontšha letago la Modimo go no ba bjalo. Re opetše kopelo sekolong sa Sontaga: “Bala Bibele, rapela letšatši le letšatši, gomme o tla gola, wa gola, wa GOLA!” Go bonolo bjalo.
