Bea tumelo ya gago go yena – Letšatši la 4

Ga re leke go le laolela tše le swanetšego go di dumela, gobane tumelong gona le tiile. Se re se dirago ke go thušana le lena go le okeletša boiketlo. 2 Bakorinte 1:24

Le ge a be a le moapostola ka maatla a filwego ke Modimo, Paulose o tlišeditše ba bangwe lethabo ka mo a ba eteletšego pele ka gona – a sa ba laole eupša a šoma le bona. Se se hlaloša gore ke ka lebaka la eng e be e le moetapele yo a šomago gabotse le gore ke ka lebaka la eng batho ba ba bego ba šoma le yena ba bile ba maatla le go ba bašomi-gotee ba go botega. Mantšu a Paulose a hlaloša se Jesu a se boditšego barutiwa ba gagwe ge ba be ba ngangišana ka yo e lego yo mogolo magareng ga bona.

Jesu o rile go bona, “Magoši a baditšhaba a gatelela ditšhaba tša ona, le babuši ba tšona go thwe ke ‘Bomothušabatho’. Fela go lena go se ke gwa ba bjalo; go upše go re yo mogolo mo go lena e be yena yo monyenyane, le moetapele a be bjalo ka mohlanka wa lena.” (Lukase 22:25-26)

Bohlokwa bja mošomo wa Bokriste, Paulose o a hlaloša, ke go šoma le ba bangwe go ba thuša go hwetša lethabo le legolo.

Magae a rena, dikhamphase le diofisi di tla lebega bjang ge re leka go tlišetša ba bangwe lethabo ka tsela ye re ba swarago ka yona?

Go tlišetša batho lethabo ga go re gore go leka go thabiša yo mongwe le yo mongwe ka dinako ka moka,eupša go swara bao ba lego kgauswi le wena bjalo ka tlhompho le seriti, bjalo ka ge Paulose a dirile. Ge re šetša dinyakwa tša ba bangwe, go akaretša tlhoko ya go hlomphiwa le tlhoko ya go tshephega ka mošomo o bohlokwa, re latela mohlala wa Paulose.

Naa o ikgafile go mešomo ye Modimo a go tshephago ka yona? Naa o tla thoma lehono?