Bea tumelo ya gago go yena – Letšatši la 3

Rena se re ikgantšhago ka sona ke gore dipelo tša rena di re hlatsela gore boitshwaro bja rena mo lefaseng, gagolo ge re be re le moo go lena, e bile bja go laolwa ke botshepegi le pelo ye e se nago bomenetša ye re e filwego ke Modimo; e bile bja go laolwa ke kgaugelo ya Modimo, e sego bohlale bja batho. 2 Bakorinte 1:12

Bakorinte ba ngongoregile gore Paulose o be sa bulega le go botega go bona; le ge a ba holofeditše gore o tlo etela Korinte gape, Paulose o paletše makga a mabedi. Naa Paulose o be a se na nnete? Naa o be a ba botša maaka?

Paulose o araba dipotšišo tše go 2 Bakorinte 1:12-14. O a ikgantšha ka gore boitshwaro bja gagwe magareng ga Bakorinte bo be bo le pepeneneng ka dinako ka moka. O diegišitše maeto a gagwe, e se ka lebaka la go se nyake go itlontlolla, eupša ka gobane o be a sa nyake go goboša goba go kgala Bakorinte gape. Ka gona, o diegišitše go boela Korinte ka kholofelo ya gore, ge a boela, o tla tliša lethabo go e na le kgalemo (2 Bakorinte 1:23-24).

Le ge botshepegi bja Paulose bo be bo gononwa, o tsebile gore ka lebaka la histori ya gagwe ya go botega go bona, ba tla tšwela pela go mo tshepha. “Rena se re ikgantšhago ka sona ke gore dipelo tša rena di re hlatsela gore boitshwaro bja rena mo lefaseng, e bile bja go laolwa ke botshepegi le pelo ye e se nago bomenetša,” o a ba gopotša.

Re nyaka botshepegi go tšwa go mebušo, baetapele ba rena le bagwera, eupša naa rena re a tshephega gore batho ba be le lebaka la go re tshepha? Letšatši le letšatši re lebeletšana le teko ya go uta nnete. Naa re a ikaketša go thega bašomi-gotee bogoneng bja bona, eupša re ba seba ge ba se gona? Mohlala wa Paulose o re bontšha gore se se fošagetše.

Ge batho ba re phelago le bona ba sa re tshephe, Modimo yena a ka re tshepha?