Bea tumelo ya gago go yena – Letšatši la 2
Leboga ditswalano
(Di)temana ya Bibele
2 BAKORINTE 1
Ge re hlokofatšwa, ke gore lena le kgothatšege, le phološwe; ge re kgothatšwa, ke gore le lena le kgothatšege, le fiwe maatla a gore le kgone go meletša ka kgotlelelo mahloko ao le rena re a meletšago. Ke ka lebaka leo go le tshepa ga rena go sa tekatekego; re tseba gore ge le hlokofatšwa bjalo ka rena, le go kgothatšega le kgothatšega bjalo ka rena. 2 Bakorinte 1:6-7
Lengwalo la bobedi la Paulose go kereke kua Korinte le thoma ka ditebogo tša gagwe tša tswalano ye e tseneletšego ye a nago le yona le Bakorinte. Ba kopantšwe mmogo moo e lego gore se se hlagelago yo mongwe, se ba hlagela ka moka. Se se a makatša ka gobane, ge o bala go ya pele, o tla hwetša gore tswalano ya bona ke ye e raraganego. O ka ikhwetša o ipotšiša ka fao batho ba ba sa dumelelanego kudu, ba nyamišanago gaešita le go galefelana ba kago bolela dilo tše bjalo ka, “… go le tshepa ga rena go sa tekatekego” (2 Bakorinte 1:7).
Karabo ke gore ditswalano tše botse ga di tšwe go dumelelaneng, eupša go hlomphaneng go phegeleleng tebanyo ye e swanago. Ka kakaretšo ga re kgethe bašomi-gotee ba rena goba batho bao ba lego go dikomiti tša go fapafapana le, goba gaešita batho ka dikerekeng tša rena – go no swana le ge Bakorinte ba sa kgetha Paulose go ba moapostola wa bona gomme Paulose ga a kgetha bao Modimo a ba phološitšego. Ditswalano tša rena tše ntši ga di a thewa go ka fao re ratanago ka gona, eupša go tlhoko ya go šoma mmogo go fihlelela mešomo ya rena ye e tlwaelegilego.
Ge dilo di thatafa kudu, ditswalano e ba tše bohlokwa kudu.
Paulose o hlaloša gabotse gore re ka se fihlelele ditswalano tše botse ka mabokgoni le mekgwa fela. Se re se hlokago godimo ga tšohle ke thušo ya Modimo. Ka lebaka le, go rapelelana e ba leswika la sekhutlo sa ditswalano tša rena. “Re thušeng ka go re rapelela,” Paulose o a kgopela.
Naa re beeletša bjang ka mo go tseneletšego go ditswalano le batho ba re šomago le bona? Naa re a ba rata go ka ba rapelela? Naa re na le taba go ka ithuta tše ntši ka maphelo a bona, gore re kgone go ba rapelela ka ditsela tša nnete? Naa re bula maphelo a rena ka mo go lekanego, gore ba bangwe ba re rapelele?
