Bea tumelo ya gago go yena – Letšatši la 10
Bolela
(Di)temana ya Bibele
2 BAKORINTE 6
Lena Bakorinte, re boletše le lena re ahlame; re le utolletše tšohle tša ka pelong. Ga se rena re le tswaleletšego dipelo tša rena, eupša ke lena le re tswaleletšego tša lena dipelo. Ke bolela le lena mo nkego le bana ba ka; re direleng se re le diretšego sona: re utolleleng tša ka dipelong tša lena! 2 Bakorinte 6:11-13
Paulose o be a rata batho kua Korinte, gomme o ba bontšhitše lerato ka ditsela tša go fapafapana. O ba bontšhitše, ka ge a bolela temaneng ya ka godimo, ka dilo tše pedi tše di kgethegilego. Sa pele ke go bolela ka go lokologa go bona. Se se ra gore o be a boledišana le bona; a ba botša se se bego se direga bophelong bja gagwe; a ba botša ka maikutlo a gagwe, dikatano, go palela, dikgatelo le mathata, gomme a ba begela gore o swaragana bjang le wona. Seo ka mehla ke leswao la lerato. Go botša ba bangwe ke go ba rata.
Se ke selo se bontši bja rena re itemogelago sona, gaešita le dikereke tša rena. Gantši re nagana gore go lokile go se bolele ka fao o ikwago ka gona, go ba le sephiri, o tswalelele batho ka ntle. Re a botšwa go phela maaka go fihlela motho a atlega, go aparela mošomo wo o o nyakago le dipolelo tše dingwe gape tše lekgolo tše di netefatšago ka mo go feletšego gore motho a se tsebe gore go direga eng ka gare. Go ba Mokriste, go ra gore go dira ka mo go fapanego le go bolela o lokologile.
Tsela ya bobedi yeo Paulose a bontšhitšego lerato la gagwe go batho ba Korinte e bile go bula pelo ya gagwe kudu. Go be go se na kgethologanyo, o be a akaretša phuthego ka moka. O be a sa bule fela pelo ya gagwe go batho ba lokilego magareng ga bona. O be a ba rata ka moka: ba ba thata, bao ba bego ba katana le bao go bego go le “boima go kwana le bona”. Go be go se na dipeolo tša pele tše a bego a di nyaka pele a rata motho phuthegong. O ba amogetše ka tsela ye ba bego ba le ka yona. Le ge a be a tseba dikatano tša bona, mafokodi a bona, bohloko bja dipelo tša bona, go palela ga bona le twantšho ya bona, o be a ba rata.
Bothata ke gore ba be ba sa mo rata. Se ke bothata dikerekeng, maphelong a batho, magaeng, malapeng le manyalong lehono. Re palela go kwešiša tlhago ya ledirani ya lerato. Lerato ke seterata sa ditsela tše pedi. Lerato le nyaka phetolo. Paulose o be a ba rata, eupša bona ba sa mo rate. Ba be ba tswaletšwe; ba sa iphetolele; ba be ba tswaletše maikutlo a bona go yena. Ba sa mmontšhe lerato, ba ipeile kgolegong ka mellwane e mennyane ya maphelo a bona a boithati.
Ke ka lebaka leo Paulose a phophothelago Bakorinte go bula dipelo tša bona.
Go bolela o lokologile go a re katološa le go dira gore re hlaselege gabonolo. Naa re ithuta go ba le dipelo tše bulegilego go bohle ka lerato, ka lebaka la Kriste le ka maatla a gagwe?
