A ka kgona … – letšatši la 2

E ka ba e sa le wa tsoga mesong o nagana ka fao lefaseng o tlago dira dilo ka moka go lenaneo la gago la “Go Dira” pele letšatši le dikela? Mohlomongwe ke ka fao o ikwago ka gona lehono.

Ke tsogile pejana ke ikwa bjalo. Poledišanong le Modimo, ke ile ka gopotšwa ka tiragalo go Joshua 10:13. Go Joshua 10, go na le ntwa magareng ga Joshua le Baisraele ka lehlakoreng le tee le Baamore ka go le lengwe. Joshua a lemoga gore ga ba na nako ye e lekanego ya letšatši go fihlelela phenyo ntweng. A kgopela Modimo go emiša letšatši le ngwedi lefaufaung go ka hwetša nako ya koketšo. Midimo a kwa kgopelo ya gagwe gomme a dira gore go direge. Ba ile ba fenya ntweng letšatši leo.

Ka dinako tše dingwe le rena re nyaka go kgopela Modimo go re emišetša letšatši le ngwedi gore re kgone go dira dilo ka moka. Le ge Yena a ka kgona, ga se ka dinako ka moka ka moo a šomago ka gona, dinakong tše ntši, O re tlatša ka bohlale, bokgoni bja go hlama le tsebo. Ka gobane o bona pele letšatši le, ka gona, O tseba mabapi le kgonagalo ya tlhohlo ye nngwe le ye nngwe le lepheko leo le kago re ema tseleng. Bohlale bja Gagwe, bokgoni bja go hlama, le tsebo di re thuša go ka phema mapheko goba go šogana le wona ka pela gape ka katlego. Se se re bolokela nako le go re dumelela go dira tše ntši.

Go Diema 3:5-6 re bala gore, “O tshephe Morena ka pelo ya gago ka moka. O se ke wa tshepha kwešišo ya gago. O gopole Morena dilong tšohle tše o di dirago, gomme yena o tla go lokišetša ditsela .” Go Jakobo 1:5 re bala gape gore, “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.”

Go e na le go wela molabeng wa lenaba ka go dumela gore re “swaregile kudu” go ba le nako le Modimo, ga re dire Yena go ba boemo bja rena bja pele. Go botoka kudu ge A laela dikgato tša rena – go e na le go mmitša ge go hlaga bothata. Modimo o dirile gore letšatši le ngwedi di eme go Joshua. O nyaka go re makatša ka bokgoni bja go go dira dipheto tša maleba, ka bohlale, bokgoni bja go hlama le tsebo. A re boledišana le Yena pele. Modimo a go šegofatše.
Mošomo wa letšatši: Kgopela Modimo go go lemoša dilo tše di utswago nako ya gago. Ka go lebanya kgopela Yena go go thuša ka go laola nako le go lemoga se o hlokago go se fetoša ge Moya wo Mokgethwa o go hlahla.