A ka kgona … – letšatši la 1

Daniele o ile a lahlelwa ka moleteng wa ditau; Shadraka le Meshaka le Abednego ba lahlelwa ka moubelong. Estere a ya, ntle le go laletšwa, go kgoši. Eliya e be e le modumedi fela Thabeng ya Karmele, a rapelela gore mollo o fologe o etšwa legodimong. Gomme Dafida a lwa le senatla, Goliate.

Go a thabiša go bala mafetšo a dikanegelo tše. Daniele o ile a phologa ka moleteng wa ditau ka gobane Modimo o ile a tswalela ditau melomo. Shadraka le Meshaka le Abednego ba phologa ntle le go swa meriri ka moubelong. Estere a kgona go phološa setšhaba sa Bajuda. Eliya a itemogela ka fao Modimo a rometšego mollo go tšwa legodimong. Gomme Dafida a bolaya senatla. Lega go le bjalo, re lebala gabonolo gore batho ba ka moka ba beile maphelo a bona kotsing, ba bile le sebete, eupša ntle le kgonono ba lwešana le dikgopolo tše bjalo ka “go thweng ge” tša letšhogo pele ga phenyo. Go thweng … ge dilo di sa direga bjalo ka ge go be go lebeletšwe? Ke, lega go le bjalo, tumelo ya batho ba le tshepho ya bona go Modimo tšeo di ba kgontšhitšego go fenya dikgopolo tša “go thweng ge”.

Go Baheberu 11:1 re bala gore, “Tumelo ke bonnete bja tše re holofelago gore di tla hlaga, ke go kgolwa tše re sa di bonego”. Gomme go Genese 18:14 re bala gore, “A go na le seo se ka šitago Morena?” Gomme re a tseba gore karabo ke aowa.

Ka moka re itemogela dihla moo go nago le boikwelo bja gore re ithekgile ka mekokotlo ya rena gahlanong le leboto. Mogongwe lehono o tshepha Modimo ka phenyo ye e phagametšego tlhago? E ka ba phološo ya ngwana wa gago, phenyo ya tša ditšhelete, mošomo o moswa, ntlo ya gago, pušetšo ya lenyalo la gago goba mohlomongwe pholo ya gago goba ya motho yo o mo ratago? Lenaba ka dinako ka moka le tla leka go go beela molaba go dikgopolo tša “go thweng ge” tša letšhogo. Ke fela tumelo le kholofelo tšeo di tlago go thuša go fenya dikgopolo tše. .

Kgwedi ye ke nyaka re tsepelela go Modimo – e se fela bokgoni bja Gagwe, eupša kudukudu yo e lego Yena. Ga a fetoge gomme ka dinako ka moka o kgona go re matlafatša ge letšhogo goba pelaelo e leka go re fihlela. A re tshephe Yena ka mo go feletšego. A ka re makatša, bjalo ka ge a dirile go Daniele, Shadraka le Meshaka le Abednego, Estere, Eliya le Dafida. Ka lebaka la eng? Ka gobane A KA KGONA.

Mošomo wa lehono: Ngwala fase dipharologantšho tše tharo tša Modimo tše di lego bohlokwa go wena. Leboga Yena ka seo.